17-декабрдиз РД-дин Гьукуматдин Председатель Абдулмуслим Абдулмуслимова алай йисан 29-майдиз Дагъустан Республикадин Кьил Сергей Меликова РД-дин Халкьдин Собранидиз кIелай Чарче гайи тапшуругъар тамамарунин нетижайриз талукьарнавай совещание кьиле тухвана.
Премьер-министрди къейд авурвал, Сергей Меликова вичин Чарче дагъустанвийрин уьмуьрдиз талукь вири месэлайрал фикир желбна. Гьа гьисабдай яз, дяведин махсус серенжемдиз, яратмишунин крарик кьил кутазвайбуруз куьмек гунин месэлайрални. 2024-йисуз РД-дин Гьукуматди сифте нубатда тамамарна кIанзавай везифаяр тайинарна. Республикадин экономика авай гьалдиз къимет гана ва гележегда ам вилик тухудай рекьер къалурна.
Региондин Кьилин тапшуругъар кьилиз акъудзавай ва бязи серенжемар уьмуьрдиз кечирмишзавай гьалдикай Дагъустандин Гьукуматдин Председателдиз республикадин гьукумдин идара ийидай органрин регьберри малуматар гана. Сергей Меликова вичин Чарче гайи тапшуругърикай 70 уьмуьрдиз кечирмишнава.
А. Абдулмуслимова къейд авурвал, Чарчин къалурунар уьмуьрдиз кечирмишзавай гьалдал датIана гуьзчивал тухузва. Гьа са вахтунда талукь планни туькIуьрнава. Ам 121 пунктуникай ибарат я. Гьар са пунктуниз талукь яз кьилиз акъуддай вахт ва жавабдар ксар тайинарнава. Республикадин халкьдин майишат вилик тухунин кIвалах давам жезва.
2025-йис ва гьакI 2026-2027-йисар патални республикадин бюджетдин проект туькIуьрнава. Лугьун лазим я хьи, Чарчин сергьятра аваз, къалурнавай вири серенжемар тамамарун патал госбюджетдай талукь такьатарни чара авунвай.
Къенин йикъалди ихьтин кIвалахар тамамарнава: 117 мулк аваданламишуниз (947,3 миллион манат) талукь 83 икьрар вахтунда кутIунна ва вири кIвалахарни тамамарна.
Республикада эменнидин налогдиз талукь буржар 1,1 миллиард манатдин тIимиларна.
Махачкъаладин гьуьлуьн портунихъ рехъ тухун патал федеральный бюджетдай такьатар чара ийидай кIвалах тухвана. И проект 2025-2026-йисара кьилиз акъудда.
Кадастрдин учет тухуниз, газдин сетар физвай чкаяр кIеви авуниз, сетрин инвентаризациядиз талукь кIвалахар акьалтIарна.
Республикадин 20 школадиз ва аялрин 5 бахчадиз лицензияр гана. Остановкайрал павильонар туькIуьрунин кIвалахдив эгечIнава. Махачкъалада гьахьтин — 5, Дербентда — 11, Избербашда — 3 ва Хасавюртдани — 3 павильон эцигнава.
172 кварталда кадастрдин комплексный кIвалахар авуна куьтягьнава. Кесиб хизанрай тир школьникар общественный транспортда аваз пулсуз фин таъминардай гьахъ-гьисабар гьазурнава.
«Олимпиадайрин гъалибчийриз, абур гьазурай педагогриз, ГИА-дин нетижайрай 100 балл къазанмишай 11-классдин ученикриз премияр гунин гьакъиндай» гьукуматдин къарар кьабулнава.
Талукь ведомствойри Махачкъала шегьердин проспектар, куьчеяр къайдадиз гъуниз талукь концепция веревирднава.
Республикадин экономика вилик тухудай кар алай проектар (603,7 миллиард манат) уьмуьрдиз кечирмишзавай гьалдал датIана гуьзчивалзава. И проект кьилиз акъатайла, 22 агъзур касдиз кьван кIвалахдай чкаяр жеда. И проектрал Новолак районда эцигзавай гарун электростанцияни алава хъхьанва.
Федеральный шегьредин Махачкъала шегьердин далудихъай тухузвай рекьин проектдинни сметадин документар гьазурнава.
Абдулмуслим Абдулмуслимова мадни къейд авурвал, санлай къачурла, республикадин экономикадиз талукь хилера кIвалахар хъсандиз кьиле физва.
«Гъилевай йис акьалтIзава. 2024-йисуз республика яшайишдинни экономикадин жигьетдай вилик финиз талукь нетижайриз ва гележегдин планриз гьукуматдин ноябрдин заседанидал килигна. Къе лугьуз жеда хьи, санлай къачурла, гьалар хъсанбур я. Федеральный ва региондин бюджетрай ахъайзавай такьатрин куьмекдалди хейлин проектар уьмуьрдиз кечирмишнава. Республикадин промышленностди, алишверишди, рекьерин майишатди, эцигунрин ва хуьруьн майишатдин хилери виликди камар къачузва.
РикIел хкиз кIанзава, Чар кIелдайла, Сергей Алимовича Дагъустан Кеферпатан Кавказдин Федеральный округда экономикадин жигьетдай вилик фидай центрайрикай сад жедайдахъ инанмишвалнай.
Республикадин Гьукуматдин кьилин макьсадни Чарче къалурнавай макьсадар, везифаяр кьилиз акъудун я», — лагьана премьер-министрди.
Хийир Эмиров
