Дагъустанда дяведин махсус серенжемдин резервдин полкуниз гьахьзавайбуруз алава яз 200 агъзур манатдин кьадарда аваз пулдин такьатар гуда. Идакай Сергей Меликова республикада авай важиблу месэлайриз талукьарнавай совещанидал хабар гана.
«Алава 200 агъзур манат икьрардин бинедаллаз къуллугъзавай аскер резервдин полкуниз гьахьнамазди, гуз эгечIда», — къейдна региондин Кьили. Ада гьакIни гьукумдин органриз ихтилат физвай пулдин такьатар чара авуниз талукь кьилдин къайда туькIуьрун буйругъна.
Украинада кьиле физвай дяведин махсус серенжем патал резервдин полкар Россиядин Яракьлу Къуватрин къенепата арадал гъизва. Анра гуьгьуьллудаказ, икьрардин бинедаллаз къуллугъзавай аскерриз, дяведин гьерекатра иштиракдайла, герек тир вири чирвилер гуда.
Къейд ийин хьи, алай вахтунда РФ-дин Яракьлу Къуватрин жергейра икьрардин бинедаллаз къуллугъзавай дагъустанвийриз са сеферда 1 миллиондилай виниз пулдин пособие гузва.
Чи мухбир
