30-ноябрдиз Махачкъаладин кьилин майдандал Хуьруьн майишатдин ва гьялдай промышленностдин къуллугъчидин йикъаз талукьарнавай мярекатар кьиле фена. Анра РД-дин Кьил Сергей Меликова, РД-дин Гьукуматдин Председатель Абдулмуслим Абдулмуслимова ва масабуру иштиракна.
Сергей Меликова республикадин АПК-дин хиле кIвалахзавайбуруз пешекарвилин сувар мубаракна ва зегьметдин рекье тафаватлу хьайибурув гьукуматдин шабагьар вахкана. Ада гьакIни и юкъуз республикадин аграрийри Украинада кьиле физвай дяведин махсус серенжемда иштиракзавайбуруз 35 тонндив агакьна недай-хъвадай суьрсет — як, майваяр, емишар, ширинлухар ва маса затIар рекье тунвайди къейдна.
Къейд ийин хьи, суварин сергьятра аваз, республикадин муниципалитетри милли майданар кардик кутунвай, хуьруьн майишатдин суьрсетдин мекераяр тешкилнавай, мугьманар шад манийралдини зиринг кьуьлералди кьабулзавай.
И юкъуз Сергей Меликова ВКС-дин куьмекдалди Мегьарамдхуьруьн райондин Чепелрин хуьре емишар хуьдай гьамбархана ва Дахадаев райондин Харбук хуьре газификациядин объект ачухна. Абурукай гегьеншдиз и нумрадин 7-чинай кIелиз жеда.
Чи мухбир
