РД-дин карчивилин ва инвестицийрин рекьяй Агентстводин кьил Гьуьсейн Гьуьсейнова республикада инвестицияр желб авунин кIвалах гегьенш хьанвайдакай хабар гана. ИкI, 2024-йисан 6 вацран вахтунда асул капиталдиз авунвай инвестицийрин кьадар 11 миллиард манатдиз барабар хьана. Им, алатай йисан гьа и девирдив гекъигайла, 116,7 процентдин гзаф я.
Къенин юкъуз Дагъустан Республикадин инвестицийрин проектрин сиягьда, санлай къачурла, 478,7 миллиард манат инвестицияр желб авун пландик кутунвай 60 проект ава. Абур уьмуьрдиз кечирмишунин сергьятра аваз, къенин йикъалди 37,7 миллиард манат серфнава. И проектри кIвалахдин цIийи чкаяр арадал гъиз куьмекзава — 25 агъзурдалай гзаф чкаяр хьун пландик ква, алай вахтунда лагьайтIа, абурукай 2 агъзурни 800 чка ачух я.
Гь.Гьуьсейнова хабар гайивал, Россиядин экономикадин ва мулкар виликди тухунин министерстводи тестикьарнавай «Региондин инвестицийрин стандарт» проект уьмуьрдиз кечирмишунин сергьятра аваз, Агентстводи муниципальный тешкилатрихъ галаз санал муниципалитетрин инвестицийрин стандарт кардик кутунин кIвалах кьиле тухузва. Инал ихтилат муниципалитетдин мулкунал инвесторрихъ галаз тухузвай кIвалахдин еридиз талукь системадикай физва. Адан бинеда муниципалитетри инвестпроектар кьилиз акъудунин кардив са жуьреда эгечIунин тегьер арадал гъун, санлай къачурла, анра инвестицияр желбна кIвалахун патал къулай шартIар тешкилун ава. Стандарт муниципалитетриз Россиядин экономикадин ва мулкар виликди тухунин министерстводи ийизвай 10 истемишуникай ибарат я.
«И серенжем инвесторар желб авунихъ, администрациядин патай хьун мумкин тир манийвилер арадай акъудунихъ, регионда зурба инвестпроектар уьмуьрдиз кечирмишун патал къулай шартIар тешкилунихъ элкъуьрнава», — къейдна Агентстводин регьберди.
Амина Муслимова
