2024-йисан сентябрдин эхирра авур гьисабунралди, Кеферпатан Кавказдин кьуд регион кIвалахдихъ къекъвезвай са касдал виридалайни тIимил ичIи чкаяр (вакансияр) гьалтзавай субъектрик акатнава. И жигьетдай кIвенкIвечи регион Ингушетия хьанва: ина са касдал 0,01 чка гьалтзава (кIвалахдин са чкадик 97 касдин умуд ква). Идакай FinExpertiza-дин пешекарри хабар гузва.
Чечняда са касдал 0,1 чка гьалтзава (яни, кIвалахдин са чкадик 19 касди умуд кутунва), Тывада — 0,47, Дагъустанда — 0,52 чка (са вакансия — 2 кас), Кеферпатан Осетияда кIвалахдалди таъмин тушир са касдал буш са чка гьалтзава. Амай регионра гьалар са кьадар хъсан я. Аналитикри гьисабзавайвал, Кеферпатан Кавказда официальный бейкарвилин дережа винизди я, гьаниз килигна, и республикайра кадрийрин кьитвилин делилар виридалайни агъузбур я.
Адет яз, экономика зайиф тир регионра зегьметдин биржада авай чIехи пай ксари гьакъикъатда кIвалахзава, амма официальный статистикадик акат тийизвай хилера — хизандин бизнесда, гъвечIи карханайра, сезондин кIвалахрал ва икI мад. Ихьтинбур патал бейкарвиляй гузвай пулдин куьмек виле акьадайвал гъил кьадай такьат я.
Гьа са вахтунда 2023-йисалай кьулухъ Россияда кIвалахдай ксарин кьитвал къвердавай гзаф жезва. И кардилай гзаф карханайри ва компанийри арзаяр ийизва – тIуьнар гьазурзавай гъвечIи карханайрилай башламишна, еке производствойрал агакьдалди. Гьи хилера виридалайни гзаф кьитвал ава? 2024-йисан сифте кьиляй «Коммерсантъ» изданиди Superjob къуллугъдихъ галаз санал 1000-далай гзаф карханайрин векилри иштиракай ахтармишунар кьиле тухванай. Абурун нетижада малум хьайивал, 86 процент тешкилатри ва карханайри кадрияр бес тахьунилай арзаяр ийизва. Виридалайни еке кьитвал авай хилерик акатзава: банкар, финансар — 85%, IT, алакъа, телеком — 83%, маса гунар — 86%, промышленность, производство — 87%, эцигунар, проектар туькIуьрун, юзан тийидай эменни — 85%, улакь, логистика, складар, ВЭД — 88%, жуьреба-жуьре къуллугъар — 86%.
Алатнавай зур йисан вахтунда и жигьетдай гьалар, хабар гузвайвал, мадни пис хьанва. Пешекарри гьисабзавайвал, мукьвал тир йисара зегьметдин базарда гьалар хъсан патахъ дегиш хьун патал къулай шартIар авач.
«Лезги газет»
