Гьар са кардив рикI гваз гатIундай касдилай гъиле кьур гьи кIвалах хьайитIани кьилиз акъудиз алакьда, адахъ вини дережадин агалкьунарни жеда. Гьахьтинбурун жергедай я курхуьруьнви Набиев Райсудин.
И йикъара чав Р. Набиев Россиядин писателрин Союздин членвиле кьабулна лагьай шад хабар агакьна. Яратмишдай интеллигенциядин жергейра фотокорреспондент, журналист, писатель, шаир, тарихчи яз активнидаказ кIвалахуни ам и дережадив агакьарна. Филологвилин чирвилер къачуна, тежрибалу, лап хъсан дережадин муаллимни хьана.
Адан сифте макъала, 12 йиса авайла, Кьасумхуьруьн райондин «Колхоздин пайдах» газетдиз акъатна. адалай гуьгъуьниз «Коммунист» (гила «Лезги газет»), «Дагъустандин муаллим», «Колхоздин пайдах», гуьгъуьнлай («Халкьдин гаф», «Коммунизмдин гатфар», «Куьредин хабарар»), «Сельская жизнь», «Пионерская правда» газетрихъ, «Блокнот агитатора и политинформатора», «Дагъустандин дишегьли», «Советское фото», «Журналист» журналрихъ галазни сих алакъа хуьз, вичин журналиствилин алакьунар артухарна.
Райсудин Набиеван гъиликай шиирринни гьикаяйрин «Сифте чубарук», «Дустариз салам!» ктабар, тарихдин «Зи хайи хуьр» ктаб, «Курхуьруькай ва адан агьалийрикай тарихдин очеркар», «Бахшбендер», «Макъалайрин чIалалди» кIватIалар, хуьруьнви манидарар тир Агъамирзоев Мирзебутаякай ва Савзиханова Зумриятакай ктабар хкатнава.
Мукьвара ада кIуьд лагьай ктаб гьукуматдин дестекар яз кIвалахзавай хуьруьнвияр тир полковникрикай, подполковникрикай ва майоррикай «Чинерал чIехи гъетер» тIвар алаз акъуднава. «За кхьизвай нубатдин и ктаб чи халкь, адан битаввални садвал, яшайиш, санлай уьлкве, адан аслу туширвал, къайда, низам хуьналди, йиф-югъ талгьуз, лап четин гьаларани чпин везифаяр ян тагана кьилиз акъудай ва алай вахтундани акъудзавай чи бажарагълу хуьруьнвийрикай я» — къейдзава авторди.
А. Агьмедпашаев,
«Куьредин ярар» культурадин макандин регьбер
