И мукьвара чна яратмишунардайбурун «Булах» кIватIалдин векил, кIахцугъви дишегьли, пуд хцин диде, са шумуд хтулдин баде, шииратдин ва прозадин вад ктабдин автор Гуьлжагьан Мисриханова Россиядин писателрин Союздиз кьабулна лагьана хабар ганай. Ингье мад са хъсан муштулух: ухулви руш Тамила Хуршидовадикайни (Салманова) Россиядин писателрин союздин член хьанва. Амни «Булахдик» квайди я.
Т. Хуршидова чи кIелзавайбуруз 2017-йисалай газетдин чинриз акъатзавай макъалайрай, шииррай, гьикаяйрай чида. КIвалин кайваниди, пуд веледдин дидеди, вичиз Аллагьдин патай пай яз ганвай бажарагъдикай менфят къачуз геж хьиз гатIуннатIани, зегьметдин, яратмишунрин нетижаяр бегьерлубур я. Писателдин къелемдикай хкатзавай шиирар, гьикаяяр кьетIен темайралди, хсуси хатIуналди, дидед чIалан девлетдикай гъавурда аваз менфят къачуналди, кIелзавайдан руьгьдиз гьахьдай къаматар чIугуналди тафаватлу жезва. И кардикай Хуршидовадин эсерар кIелзавайбуру газетдизни разивилин гафар кхьена.
Тамила Хуршидова «Кварцин нур», «Дидедин къужах» ктабрин автор я. Адан эсерер уртах «Илгьамдин булахар», «Руьгьдин эверун» кIватIалрани гьатнава. Шаирди вичин эсерар урус чIалалдини акъудун патал гьазурнава. Мукьвара гьа ктабдизни дуьнья аквада. Яратмишунрин рекье мадни агалкьунар хьурай вахъ, гьуьрметлу Тамила.
Абад Азадов
