Банкариз талукь яз
1-ноябрдилай къуватда гьатнавай къайдадал асаслу яз, тадиз гьакъи гунин къурулушдикай (СБП) менфят къачудайла, банкари гьукуматдин хийирдиз комиссия кьадач. Мисал яз, налогар ва я аялрин бахчадин гьакъи гудайла, икьван чIавалди кьаз хьайи процентар къуватдай вегьенва. СБП-дай маса жуьредин такьатар ракъурдайла, ихьтин кьадарар-къиметар кардик акатнава:
— жуван счетрин арада 30 миллион манатдал ва маса ксариз 100 агъзур манатдал кьван комиссия галачиз ракъуриз жеда;
— винидихъ къалурнавай тайин кьадаррилай артух ракъурдай такьатрикай 0,5 процент комиссия кьада, амма садра ракъурзавай такьатрай 1500 манатдилай артух комиссия кьадач.
Соцсетриз талукь яз
Соцсетрихъ галаз алакъалу цIийи къайдаярни тайинарнава. 10 агъзурдалай виниз ксар желбнавай аккаунтрин сагьибри Роскомнадзордиз малуматар гун лазим я. Соцсетра авай ихьтин чинар Роскомнадзорди махсус сиягьдик кутазва.
Эгер аккаунтдикай малуматар тагайтIа, адан сагьибдивай вичин чина реклама чапиз ва донатар кIватIиз жедач. Масабурувай лагьайтIа, ихьтин аккаунтрин малуматар чпин чинриз ахкъудиз (репост) жедач.
Майнингдиз талукь яз
Криптовалютадин майнингдал анжах махсус сиягьдик кутунвай тешкилатчийриз ва ИП-диз машгъул жедай мумкинвал гузва. Махсус сиягьдик квачир ватандашризни гузва мумкинвал, амма абуру электроэнергия гьукуматди тайинарнавай кьадардилай артух ишлемиш тавунин шартIунал кIевелай амална кIанзава.
Ипотекадиз талукь яз
Банкари хизандин ипотека гуьнгуьна хтунва. Идалай вилик и жуьредин ипотека вахт акьалтI хьайивиляй акъвазарнавай.
ЖКУ-диз талукь яз
ЖКУ-дай гузвай субсидияр тайинарунин къайда цIийи кьилелай тестикьарнава. Эгер субсидия гунин къарар кьабулдай вацран сад лагьай юкъуз арзачидин кIвачихъ суддин къарардалди успатнавай налогрин бурж галамаз хьайитIа, адаз субсидиядин такьатар тайинардач.
«Лезги газет»
