Чи ватанэгьлияр — гьар сана
Чеб бинеламиш хьанвай чкайра медицинадин хиле агьалийриз лайихлувилелди къуллугъзавай ватанэгьлийрикай тарифдин гафар чав мукьвал-мукьвал агакьзава. 1983-йисан 4-июлдиз Мегьарамдхуьруьн райондин Самур хуьре дидедиз хьайи, кьисметди Новороссийск шегьердиз акъуднавай хирург, колопроктолог, эндоскопист Максим Маликович Тагьировни гьахьтинбурун жергедай я.
Мектеб гимишдин медалдалди куьтягьай жегьилди гележегда вичин пеше медицинадихъ галаз алакъалу авун кьетIна: 2006-йисуз ада Кубандин госмедуниверситет «Сагъарунин кар» пешедай акьалтIарна. Гуьгъуьнлай и вузда «Хирургия» пешедай интернатурада, 2009-йисуз и пешедай Краснодар шегьердин крайдин тади куьмекдин клиникадин азарханада ординатурада чирвилер артухарна. 2009-йисалай ада Новороссийск шегьердин азарханада хирургвиле кIвалахна. 2018-йисалай инихъ и пешедай федеральный медико-биологический агентстводин Новороссийскдин клиникадин центрада зегьмет чIугвазва.
Адахъ вичи тешкилай гъвечIи клиника ава. Клиникадин кIвалахдикай, хайи хуьруьхъ галаз алакъайрикай ва Новороссийскда авай лезгийрин тешкилатдикай ихтилат ая лагьайла, духтурди къейдна: «Зун хайи хуьруьз мукьвал-мукьвал хъфиз алахъзава. Амма гьелелиг 2 йисалай садра хъфидай мумкинвал жезва. Гьелбетда, чи ватанэгьлийрин тешкилатди шегьерда кьиле тухузвай мярекатра за вахт хьайи вири дуьшуьшра иштиракзава. Гележегда заз жуван хирургвилин алакьунарни тежриба ва хсуси клиника еримлу авунин фикир ава».
2014-йисуз Сочи шегьерда кьиле фейи Олимпиададин ва Паралимпийский хъуьтIуьн къугъунар кьиле тухуник еке пай кутунай адан пешекарвилин, гьакъисагъвилин зегьмет грамота гуналди къейдна.
Чи ватанэгьлиди сагъар хъувур хейлин ксари кхьенвай разивилин, алхишдин гафар интернетдин махсус сайтрани тIимил авач. Ингье адан тIварцIихъ вуч кхьенватIа.
«Саки 30 йисуз заз азарди азият гана. Анжах Максим Маликович себеб яз, зи азар квахьна. Пешедин гъавурда хъсандиз авай и духтурдин патав фин за вирибуруз теклифзава. Ада зи уьзуьр сагъарунин карда цIийи къайдаяр ишлемишна. За кьатIана хьи, анжах медицинадин тадаракар хьуналди вири крар туькIуьзвач, абур гъавурда аваз ишлемишдай пешекарвални герек я. Гьахьтин алакьунарни пешекарвал авай духтур я М. Тагьиров», — кхьенва са ватандашди.
«За Тагьиров Максим Маликовичаз зи тIал квехъ галаз алакъалу ятIа гьасятда чирунай, гьа юкъуз операция кьилиз акъудунай чухсагъул лугьузва. Ада сагъар хъувурдалай кьулухъ за жув чан алай инсан тирди цIийи кьилелай гьисс хъувуна. Заз азабар гайи тIал квахьнава. Хъсан пешекардал ацалтна зун», — кхьизва маса кубанвиди.
Духтурдин тIварцIихъ кхьенвай ихьтин тарифдин къейдер мадни гъиз жеда. Инсанрин разивилелай, абуруз уьмуьр давамардай мумкинвал хгуз алакьунилай гъейри, вичин хиве еке жавабдарвал авай хирургдихъ маса хъсан шабагь авач жеди.
Ада медицинадин хилез талукь хейлин конференцийра гьар йисуз иштиракзава. Ватанэгьлидин хизанда пуд веледдиз тербия гузва. Къуй адахъ мадни еке агалкьунар хьурай!
К. Ферзалиев
