12-ноябрдиз РД-дин Кьил Сергей Меликов Дагъустандин Огни ва Дербент шегьерриз фена, образованидин, санайидин, спортдин са жерге объектриз килигна. Гуьгъуьнлай Дербент тамамдаказ еримлу авунин месэлайриз талукь совещание кьиле тухвана.
Региондин регьбер сифте нубатда Дагъустандин Огни шегьердин аграрный колледждиз фена. Гележегдин агрономар, сварщикар, ветеринарар, автомеханикар ва маса пешекарар гьазурзавай колледждин кабинетриз килигай ада студентрихъни муаллимрихъ галаз ихтилатарна. Колледждихъ Дербент ва Ахцегь районра филиаларни ава. Колледжда 900-далай виниз жегьилри чирвилер къачузва. 1955-йисалай кардик квай и идарада советрин девирдин образованидин лап хъсан адетар хуьзва.
С. Меликов «Дагестан Стекло Тара» заводда кардик кутазвай цIийи цехдихъ галазни таниш хьана. Эцигунрин кIвалахар акьалтIарайдалай кьулухъ ина са йисуз 144 миллиондив агакьна шуьшеяр акъудиз жеда. Им заводда икьван чIавалди акъудзавай шуьшедин кьадар саки 2 сеферда артух жеда лагьай чIал я. Карханади хъвадай затIар, дарманар ва маса суьрсетар патал хъсан еридин шуьшеяр гьазурда. Заводда кIвалахдай 172 чка артух хъжеда. Алай вахтунда ана 500-дав агакьна ксари зегьмет чIугвазва. Заводда акъудзавай шуьшеяр Азербайжандиз, Гуржистандиз, Белорусдиз, Эрменистандиз ракъурзава.
Идалай кьулухъ С. Меликов Дербентдин патав «Патриот» парк туькIуьрунин кIвалахрихъ галазни таниш хьана.
И юкъуз Сергей Меликова иштиракай кьилин мярекат Дербентдин къерехдивай фидай цIийи рехъ шад гьалара ачухуниз талукьди тир. 3,7 километрдин яргъивал алай рехъ федеральный шегьредилай шегьердин гьуьлуьн къерехда авай куьчедал (набережная) кьван агакьзава. ЦIийи рекьи шегьердал акьалтзавай пар кьезиларун вилив хуьзва.
РД-дин Кьили цIийи рехъ арадал гъунин кIвалахар агалкьунралди куьтягьун вирибуруз мубаракна ва и карда тафаватлу хьайибуруз государстводин шабагьар гана.
И юкъуз С. Меликов къадим шегьердин образованидин са жерге идарайриз, динрин ибадатханайриз фена. Дербентдин цIийи мэр Агьмед Къулиеван кIвалахдиз республикадин регьберди нубатдин сеферда еке къимет гана.
Гегьеншдиз РД-дин Кьилин сайтдай кIелиз жеда.
Чи мухбир
