И мукьвара Махачкъалада, 5- нумрадин лицейдин актовый залда, Дагъустан Республикадин государстводин 1-классдин гьакъикъи советник, РД-дин Кьилин патав гвай агъсакъалрин Советдин, Россиядин писателрин Союздин член, публицист, драматург, Дагъустандин юстициядин министерстводин патав гвай общественный советдин председатель, профессор, РАЕН-дин член-корреспондент, Дагъустандин лайихлу экономист, РФ-дин Президентдин ва РД-дин Кьилин Грантрин сагьиб, Дагъустандин Халкьдин Собранидин Комитетдин ва Общественный палатадин эксперт, запасда авай полковник Ислам Мурадович Мегьамедован Волгограддин «Панорама» чапханада акъатнавай «Камаллу ва сад тир Дагъустан» ктабдин презентация кьиле фена. Мярекатда республикадин жавабдар къуллугърин сагьибри, интеллигенциядин векилри, журналистри, лицейда кIелзавай аялрини педколлективди ва масабуру иштиракна.
Ктабдихъ галаз танишаруниз талукь мярекатдиз лицейдин директор Патимат Османова (мярекат ада кьиле тухвана) кьиле аваз лицейда кIелзавай аялри ва санлай коллективди хъсан гьазурвал акунвай. Актовый залда Ислам Мегьамедован ктабрин выставка гьазурнавай. Мярекат уьлкведин гимн, лицейда чирвилер къачузвай рушарини гадайри еке устадвилелди кьуьлер тамамаруналди ачухна. Автордиз ктаб мубарак авунин, адан мана-метлебдихъ галаз танишарунин келимаяр — сифте гаф РД-дин милли политикадин ва диндин крарин рекьяй министр Энрик Муслимова лагьана.
— Ктабдин тIвар ва ада гьатнавай Дагъларин уьлкведин районрикай, гуьрчег тIебиатдикай, СВО-дикай, инсанрикай, гьа гьисабдай яз лазим вахтунда важиблу къарар кьабулиз алакьдай регьберрикай, чи республикадин хьиз, уьлкведин тарихдани дерин гел тур вакъиайрикай, кьилди къачуртIа, международный бандитрин кIватIалар терг авуниз талукь материалар сад-садахъ галаз лап хъсандиз кьунва. Алатай асирдин 90-йисара СССР чкIайла, чаз гьихьтин девирда яшамиш хьун кьисмет хьанатIа, къе и залда ацукьнавайбурукай гзафбурун рикIел алама. 1999-йисуз Дагъустандиз международный бандитрин кIеретIар гьахьайла, республикадин кьиле авай ксари, камалэгьлийри, дуьз къарарар кьабулуналди, Дагъустанда яшамиш жезвай гзаф кьадар миллетри садвал къалуруналди, бандитрин кIватIалар терг ийиз алакьна. В. Путина къейд авурвал, дагъустанвийри неинки чпин чил, Ватан, гьакI сад тир уьлкведин мулкарин тамамвални хвена. Ислам Мурадовичан ктабда гьатнавай республикадин вакъиайрикай, камаллу ксарикай макъалайри акьалтзавай несил ватанпересвилин руьгьдаллаз тербияламишуниз куьмекда, лазим атайла, абуруз важиблу къарарар кьабулиз чирда, — къейдна ада.
Мярекатдал рахай амай ксарини, гьа гьисабдай яз Дагъустандин Общественный Палатадин председатель Азизбег Черкесова, Дагъустандин журналистрин Союздин председатель, «Лезги газетдин» кьилин редактор Мегьамед Ибрагьимова, РД-дин Кьилин патав гвай агъсакъалрин Советдин председатель Ибрагьим Ибрагьимова, РД-дин юстициядин министрдин заместитель Сергей Къараченцева, ДГПУ-дин проректор Руслан Гереева, профессор Шайдабег Мирзоева, Россиядин халкьарин Ассамблеядин ДРО-дин председатель Зикрулла Ильясова ва масабуру Ислам Мегьамедован ктаб еке зегьметдин нетижа тирди къейд авунихъ галаз сад хьиз, адахъ акьалтзавай несил ватанпересвилин руьгьдаллаз тербияламишунин, республикадин тарихдин чинар хьиз, баркаллу рухвайрикайни малуматар ачухунин жигьетдай еке важиблувал авайдакай лагьана. Гьавиляй ам республикадин вири школайрихъ хьун лазим тирди, адакай гьам муаллимар, гьамни школайра кIелзавай аялар патал еке куьмекчи жедайди къейдна.
— Ктаб, дугъриданни, республикадин яшайишдин саки вири хилерай, Дагъларин уьлкведин гзаф муниципалитетрикай хьиз, тарихдикайни, кьегьал рухвайрикайни (ва икI мад) итижлу делилралди девлетлуди хьанва. Ам гьам юристдин, гьам духтурдин, гьам муаллимдин столдал хьуниз лайихлуди я. Зи фикирдалди, ктабдин бинедаллаз школайра ачух тарсар кьиле тухуз жеда. Къенин юкъуз акьалтзавай несилди интернетда, соцсетра гзаф вахт акъудзава. Абуру Дагъустандин тарихдиз са акьван итижзавач. Гьаниз килигна, 5-нумрадин лицейдилай эгечIна, республикадин чирвилер гудай вири идарайра ачух тарсар кьиле тухун хъсан кар жеда, — меслятна «Лезги газетдин» кьилин редактор Мегьамед Ибрагьимова.
Гьа са вахтунда ада Ислам Мегьамедов редакциядин амадагрикай сад, лазим чIавуз куьмек гуз гьазур кас тирдини къейдна. Алкьвадар Гьасанан тIварунихъ галай медениятдинни просвещенидин центрадин активдин член яз, кьиле тухузвай мярекатра ада датIана иштиракзавайди раижна.
Дугъриданни, чахъ викIегь ва бажарагълу регьберар ава, виликдайни абур хьана. ИкI, ктабда государстводин машгьур политик ва деятель, республикадин битаввал хуьн ва дагъустанвияр сад авун патал 1994-йисуз Дагъустандин цIийи Конституция кьабулай, идалди регион чукIуруникай хвейи рагьметлу Мегьамедали Мегьамедова кьетIен чка кьунва. Мярекатдал рахай саки вирида камалэгьлидин регьбервилин алакьунар рикIел хкана. Къунши Чечняда дяве кьиле физвайла, республикада политикадин ва экономикадин гьалар чIур хьанвайла, Дагъустандин регьбердиз гьар юкъуз регьят тушир ва жавабдар къарарар кьабулун лазим къвезвай. Къенин юкъузни халкьди, М. Мегьамедован бажарагълувилин нетижа яз, республика дяведик кьил кутуникай хуьз алакьайди рикIел хкизва.
Ктабда 1999-йисан вакъиайриз, Дагъустандиз международный бандитрин кIватIалар гьахьайла, гъиле яракь кьуна, Ватан хуьз майдандиз экъечIай кьегьалрикайни кхьенва. Къенин юкъуз СВО-да чи уьлкведин итижар хуьзвай кьегьалри — игитрини ктабда тIимил чка кьунвач.
Мярекатдал рахай ксари гьа са вахтунда ктабдин автор Ислам Мегьамедов вични еке ватанперес, зегьметкеш, камалэгьли, республикадин уьмуьрда активнидаказ иштиракзавай, Дагъустан патал важиблу ва дуьз къарарар кьабулуник вичин лайихлу пайни кутур ва кутазвай кас тирдини къейдна.
КIватI хьанвайбур муаллим Патимат Юнусовади лицейда кIелзавай аялар ватанпересвилин руьгьдаллаз тербияламишунин мураддалди кьиле тухузвай кIвалахдихъ галазни танишарна.
Эхирдай Ислам Мегьамедова мярекатдиз атанвай ксариз сагърай лагьана, абуру гайи теклифар фикирда кьуналди, ктаб республикадин школайриз рекье тун хиве кьуна. Дагъустандин садвал хуьнихъ ва республика вилик финиз талукь яз вичин фикирар раижна, акьалтзавай несил ватанпересвилин руьгьдаллаз тербияламишунин важиблувал къейдна.
Рагнеда Рамалданова
