Агьалийриз эвер гузва!

СФР-дин Дагъустандин отделениди агьалийриз лутуйрикай мукъаят хьуниз эвер гузва. Идакай ведомстводин сайтда раижзава.

Чешмеди раижзавай къейдерай малум жезвайвал, лутуйри датIана агьалияр алдатмишдай къайдаяр жа­гъур­зава, иллаки — яшлу ксар. И кар себеб яз пенсионерар мукьвал-мукьвал жуьреба-жуьре уюнрал расалмиш жезва ва чIуру ниятар авай ксарин къурбандриз элкъвезва.

Сифте нубатда лутуйри яшайишдин­ сетра (социальные сети) ва мессенджер­ра пенсионерар СФР-дин яша­йишдин рекьяй хуьдай отделрин патахъай ахтармишзава лугьудай, гьакъи­къатдихъ галаз­ кьан тийизвай, хабарар чукIурзава. Идалайни алава яз, чеб СФР-дин Да­гъус­тандин отделенидин къуллугъчияр­ хьиз танишвал гуз, абур яшлу агьалий­рин квартирайриз физва, чпи гуя офи­циальный­ документра авай пропискаяр гьакъикъат­да яшамиш жезвай чкадихъ галаз «кьаз­ва­тIа» (сверка) ахтармишзавайди я лугьузва.

И кардихъ галаз алакъалу яз, СФР- дин Дагъустандин отделениди агьалийриз лутуйри туькIуьрзавай фендерин къурбандар тахьуниз эвер гузва. Ведомстводи къейдзавайвал, фондунин къуллугъчияр са гьихьтин ятIани «хабар кьу­нар» (опросы), ахтармишунар кьилиз­ акъу­дун патал садрани агьалийрин кIва­ле­риз физвайди туш. СФР-дин Дагъус­тандин отделенидин сайтда ихьтин малумат гузва: эгер куь патав инсанар атана ва чеб Яшайишдин фондунин къуллугъчияр я лугьузватIа, чIа­лахъ жемир, абур лутуяр я.

СФР-дин Дагъустандин отделениди рикIел хкизвайвал, агьалийриз вири къуллугъар и ведомстводин отделенидин «муьштерийриз къуллугъдай­ чкайра» (в клиентских службах) ва гьакIни МФЦ-да ийизва, вични — пулсуздаказ. Идалайни алава яз, абурукай гзаф къуллугъар, кIваляй экъечI тавуна, «Госуслуги» порталдин куьмекдалдини къачуз жезва.

Сайтда хабар гузвайвал, агьалий­ривай консультацияр, пулсуз тир фе­деральный нумрадиз (8-800-1-00000-1)  зенг авуна, СФР-дин контакт-центрадай къачуз жеда. Гьа са вахтунда ведомстводин телда агьалийрин фи­­кирдиз СФР-дин Дагъустанда авай отделенидин «горячий линиядин» нум­рани гъизва: 8-800-200 — 03-39 (зенг пулсузди я).

Хабар гузвайвал, региональный «горячий линиядин» кIвалахдин график ихьтинди я: ислен йикъалай хемис йи­къал­ди — экуьниин сятдин 9-далай нянин сятдин 6-далди (09:00 — 18:00); жуьмя юкъуз — экуьнин сятдин 9-далай нянин сятдин 5 жез 15 декьикьа амаз (09:00 — 16:45).

Фикир ава

Дагъустандихъ 2 йисан къене мадни 1,5 агъзур километрдин газдин турбайрин линияр тухудай фикир ава. Идакай «Дагъустандин экономика» те­леграм-каналди хабар гузва.

Кьилди къачуртIа чешмеди кхьизвайвал, 2026-йисалай 2027-йисалди Да­гъустанда 22 муниципалитетда газдин цIийи линияр тухун пландик кутунва, абурун арадай яз — дагълух чкадани.

ИкI, «Газпром» ПАО-дин инвестицийрин гьисабдай мадни 660 километр поселокрин арада (межпоселковые) ва 990 километр поселокрин къене (внутрипоселковые) газдин турбаяр тухун планда ава.

Гьа са вахтунда къейдзавайвал, ­Да­­­­гъустандин бюджетдин такьатрихъ   2025-йисалай 2027-йисалди 60 кило­метр­­дин газдин сетар эцигунни пландик кутунва.

Чешмеди гъизвай къейдерай малум­ жезвайвал, алай вахтунда Дагъустандин газдалди таъминарунин (газификация) дережа уьлкведин юкьван гьисабдин рекъемдилай алатнава ва ам тахминан 75-77 процентдиз барабар я.

Къабахрин бегьер

Дагъустанда къабахрин бегьер 2024-йисуз кьве сеферда артух хьанва, адан кьадар 678 агъзур центнердиз барабар я. Идакай «Дагъустандин экономика» телеграм-каналди кхьизва.

Чешмеди гъизвай делилралди, рейтингдал асаслу яз, республикади уьл­кведин регионрин арада, и жуьредин майваяр кIватI хъувунин кьадардал гьал­­тайла, кIвенкIвечи чка кьунва.

Хабар гузвайвал, къабахрин бегьер, алатай йисан рекъемдив гекъигайла, 2,3 сеферда виниз акъатнава. Йис идалай вилик къабахрин бегьердин рекъем­дал гьалтайла, республика 7-чкадал алай.

Телеграм-каналди кхьизвайвал, 2 ва 3-чкайрал Татарстан ва Саратовдин область ала, абурулай гуьгъуьниз рейтингда Волгограддин область ава. Гьа са вахтунда чешмеди раижзавайвал, октябрдин делилралди, уьлкведа, санлай къачурла, 112,5 агъзур тонн къабахар кIватI хъувунва.

Гьазурайди — Муса  Агьмедов