2-ноябрдиз Усугъчайдал, медениятдин­ кIвалин залда, мергьяматлувилин «ЛЕ­КИ» фондуни, «Лезги газетдин» редак­цияди, ФЛНКА-ди Докъузпара райондин администрациядин куьмекдалди Дагъустандин мектебра 6-7-классра кIел­завайбурун арада чпи теснифнавай шиирар фасагьатдаказ кIелунай акъажунар кьиле тухвана. Эдебиятдин мярекатда Докъузпара, Ахцегь, Мегьарамдхуьруьн, СтIал Сулейманан, Кьурагь районрин, Махачкъала ва Дагъус­тандин Огни шегьеррин мектебрин 37 ученикди иштиракна.

Авайвал лагьайтIа, республикадин де­режада аваз кьиле физвай конкурс­да гзаф кьадар аялри иштиракун лазим тир. Алакьунар авай аялрихъ галаз муаллимри кьетIендаказ кIвалахун, абур яратми­шунрал желбун герек я. Аялриз хайи чIални эдебият кIанарунин, абурун арадай бажарагъ авайбур винел акъудунин макьсадралди тешкилзавай конкурсра иштиракдай алакьунарни ашкъи авай вирибуруз чкайрал гьам муаллимри, гьам диде-бубайри куьмек гана кIанда.

Мярекат ЦIийи Къаракуьредин мектебдин муаллим С. Эюбовади лезги чIа­лал мани тамамарунилай башламишна.

«ЛЕКИ» фондунин векил Руслан Мегь­диханова мярекат ачухна ва жюридин векилрихъ галаз танишарна. Аялрин алакьунриз Дагъустандин писателрин союздин лезги секциядин регьбер, критик Максим Алимова, гьикаятчи, Лезги писателрин союздин регьбер Абил Межидова (тахаллус — Сардар Абил), «Лезги газетдин» кьилин редактор Мегьамед Ибрагьимова ва адан заместитель Куругъли Ферзалиева къимет гана.

Докъузпара райондин кьил Мегьамед Шамилова хайи чIалахъ, эдебиятдихъ, медениятдихъ галаз алакъалу мярекатар тухунихъ акьалтзавай несилар патал еке метлеб авайди къейдна. «ЧIалан куьмекдалди халкьдин адетар, уьмуьрдин къайдаяр несилрилай несилрал агакьарзава. Хайи чIал неинки миллетдин векилрин рахунрин алат, гьакI халкьдин тарих ва руьгьдин къудрат къалурзавай такьатни я. Гьавиляй анжах чIал хуьналди чавай чи тарих­ни хуьз жеда», — лагьана райондин кьили.

Аялар шиирар кIелунив эгечIдалди вилик хейлин мугьманри, гьа гьисабдай яз жюридин векилри, «ЛЕКИ» фондунин гене­ральный директор Гьасан Гьасанова, медениятдинни образованидин хиляй кIва­лахзавай и фондунин векил Руслан Мегьдиханова, ФЛНКА-дин векил Садикь Гьасанова, Кьурагь райондин образованидин управленидин начальник Эльдар Медетова, Гъуьгъвезрин мектебдин директор Исамедин Шагьэмирова, «ЛЕКИ» фондунин крар идара ийизвай директор Закир Къагьриманова ва хейлин масабуру абурухъ агалкьунар хьун алхишна, чIал хуьн патал аву­на кIанзавай крарикай, чпин фикирар лагьана. Абуру къейд авурвал, чIал хуьн патал эвелни-эвел ам рахунрин алат хьун чарасуз я. Вучиз ятIани, эхиримжи вахтара хуьрерин аяларни урус чIалал рахазва. Чпин фикирар лагьай вирибуру гьам кIвале, гьам куьчеда жуван миллетдин векилрихъ галаз хайи чIалал рахун важиблу тирди къейдна.

Шииратдин акъажунрин шартIарихъ галаз кIватI хьанвайбур «Лезги газетдин» кьилин редактор, шаир Мегьамед Ибрагьимова танишарна. Кьилин шартIарикай сад кIелдай шиир аялди вичин рикIиз кIани темадай кхьенвай хсусиди хьун тир. Кьилди къачуртIа, аялрин яратмишунриз ва абур кIелунин устадвилиз къимет гудайла, жюридин векилри са шумуд месэладиз фикир гана: 1) шиир ученикди вичи­ кхьенвайди хьун; 2) шиир хуралай чир хьун; 3) манадин гъавурда аваз хьун; 4) га­фар (сесер) ачухдиз, дуьздаказ сивяй акъудун; 5) гьиссер кваз, фасагьатдаказ кIелун; 6) артиствилин алакьунар хьун.

Жюридин векилри къейд авурвал, аялрин алакьунриз, кIелай эсерриз къимет гун са акьван регьят акъвазнач. Бязи эсерар метлеблубур, чIалан жигьетдай­ девлетлубур, эдебиятдин такьатрикай менфят къачуналди теснифнавайбур, чеб аялри теснифнавайбур я лугьунал шак фейибур хьуниз килигна, къимет гузвайбуру саки гьар са шиир кIелай аялдиз суа­лар гана.

ИкI, конкурсдин нетижаяр ихьтинбур­ хьана: 1-чка Мегьарамдхуьруьн 1-нумра­дин­ мектебдин 6-классдин ученик Осман Аба­сова кьуна (адаз 15 агъзур манат­ гана)­, 2-чка — Курхуьруьн 2-нумрадин мек­тебдин ученица Гуьлмира Мелико­ва­ди (адаз 10 агъзур манат гана), 3-чка — Мегьарамдхуьруьн искусствойрин­ мектеб­дин ученица Рамиля Агъаевади­ (адаз 5 агъзур манат гана). Пулунин пиш­кеш­ри­лай гъейри, 1, 2 ва 3 лагьай чка­яр кьурбурув «ЛЕКИ» фондунин, «Лезги газетдин» редакциядин, ФЛНКА-дин кьиле авайбурун къулар алай грамотаяр вахкана.

КIвенкIвечи чкаяр кьур пуд аялдиз Лезги писателрин союздин председатель Абил Межидовани грамотаяр гана.

Конкурсдин хъсан кьетIенвилерикай сад ам тир хьи, санлай къачурла, 23 иштиракчидив грамотаяр ва пишкешар агакь­­на. ИкI, кIвенкIвечи пуд чка кьурбуру­лай алава яз, 10 аялдиз гьардаз 3 агъзур манат ва мад 10 аялдиз гьардаз 2 агъзур манат пул пишкешна.

КьетIен гьиссералди шиир кIелай Мис­кискарин мектебдин ученицадиз Абил Ме­жидова вичин патай алава яз 5 агъзур манат пишкеш хъувуна.

Усугъчайдал кардик квай райадми­нист­рациядин столовойда вири иштиракчияр, мугьманар патал тIуьнар гьазурнавай.

Эхирдай Докъузпара райондин обра­зованидин управленидин начальник Руслан Исмаилова вири иштиракчийриз, тешкилатчийриз сагърай лагьана.

Конкурсда хъсан чкаяр кьурбурун шиирар «Лезги газетда» чапдай фикир ава. Къуй чахъ хайи чIалални эдебиятдал рикI алай, чпихъ хци кьатIунар ва еке алакьунар авай жегьилар гзаф хьурай.

С. Салимов