Милли медениятди гьар са инсандин уьмуьрда кьетIен чка кьазва. Милли манидихъ ва я макьамдихъ яб акалдай вахтунда чи рикIелай вири татугайвилер алатда, чанда гьатнавай галатунин гьисс, гъили вахчурди хьиз, са гьиниз ятIани квахьда. Эгер виликдай лезги манийризни макьамриз тек са радиодайни телевизордай яб гуз жезвайтIа, интернет пайда хьайи­далай кьулухъ и кар кьилиз акъудун генани регьят хьанва. Гьайиф хьи, интернетдикай менфят къачуна, алай вахтунда яб гузвайбурун вилик манийрин чпин, я тахьайтIа абурун авторрин тIварар дуьз делилар алачиз акъудзавай дуьшуьшри чун мад ва мад сефер­ра абурукай раху­низ­ мажбурзава­. И кар себеб­ яз, за «Лезги­ газетдиз» са шумуд­ ма­ни­дин па­тахъай­ ма­къала­яр­ни кхье­най­. Ингье­ ги­лани ихьтин­ гьахъ­суз­вилиз рехъ тагун­ патал зун мад къелем гъиле кьуниз мажбур жезва. Къенин макъа­лада заз Айдунбег Камилован чIалариз Падишагь Киберова гьава теснифнавай «Дуствилин ма­ни­дикай» рахаз кIанзава.

«Дуствилин мани» сегьнедиз алатай асирдин 80-йисара акъатна. Сифте сефер яз Тарлан Мамедова тамамарайдалай кьулухъ и мани гьасятда халкьдин арада машгьурни хьана. Са юкъуз интернетдин «Ютуб» видеохостингда къекъведай чIавуз заз са чкадал «Дуствилин мани» чIа­лар Айдунбег Ка­милованбур, гьава Тарлан Мамедованди» гафар кхьенваз акуна. Ихьтин гьахъсузвал акурла, зун гьасятда зи дуст, «Лезги газетдин мухбир, Урусатдин журналистрин союздин член Мурад Саидован куьмекдалди рагьметлу Падишагь Фезлидиновичан хва Рамеш Киберовахъ галаз телефондин алакъадиз экъечIна ва ам агьвалатдин гъавурда туна. И кардикай ван хьайила, ада зал, вичин бубадин архивдай жагъур хъувуна, винидихъ тIвар кьунвай манидин нотайрин гъилин хатIар агакьарна. А гъилин хатIари «Дуствилин манидин» чIалар Айдунбег Камилован, гьавани ­Падишагь Киберован гъиликай хкатнавайди субутзава. Идалайни алава яз, «Дуствилин манидин» автор Падишагь Киберов тирди, Мурад Саидова кхьена, «Лезги газетдин» 2017-йисан 13-июлдиз акъатай 28-нумрада чапнавай «Адан авазар халкьдин руьгьдай къвезвай» тIвар алай макъаладини тестикьарзава. Кьилди къачуртIа, автор­ди вичин макъалада кхьизва: «Дагтелерадиодин халкьдин алатрин оркестрдин солист ва Даггос­университетдин гьа ихьтин ор­кестр­дин регьбер яз П. Киберова руьгьдиз таъсирдай авазар теснифна. Абурукай гзафбур («Яргъи руш», «Дагъустан», «Сусан булах», «Хуш я рикIиз зи», «Темпелдин фикирар», «За къизилгуьл низ гурай?», «Дуствилин мани», «Къизилдин тупIал», «Ала­гуьзли» ва мсб.) лезги халкьдин макьаматдин къизилдин фондуна гьатнава». Винидихъ ганвай делилри «Дуствилин манидин» авторар Айдунбег Камиловни Падишагь Киберов тирди лап хъсандиз субутзава. Идахъ галаз алакъалу яз, и кIвалах инкар авун, заз чиз, гьам Айдунбег Камилован, гьам Падишагь Киберован руьгьериз гьуьрмет тавун жезва.

Гьуьрметлу дустар! Ша чна жуван гъилералди­ жуван медениятдани харусенятда гьакъикъат вилив­ хуьн. Манийринни авазрин тIварарни абурун авторар­ дуьз делилар алаз яб гузвайбурун вилик акъудин. Эгер, чун вири сад хьана, и кар виликди тухуз алахъайтIа, чи зегьметди бегьер гудайдал шак алач.

Эдуард Ашурагъаев