Чи ватанэгьлияр — гьар сана
Краснодардин крайдин Новороссийскда авай лезгийрин агалкьунрикай, ана арадал гъанвай лезгийрин тешкилатди тухузвай милли мярекатрикай чна идалай виликни хабар гана. Ихьтин мярекатрик кьил кутазвайбур жуьреба-жуьре къурулушра кIвалахзавай, гьа са вахтунда жемиятдин краривайни къерехда тежезвай, гьина аватIани, рикIик милли эйнивал ва къанажагъ хуьнин гьиссер квай ватанпересар я. Вичикай чаз и мукьвара хабар хьайи тежрибалу юрист Низам Султанагьмедович Малласеидовни гьахьтинбурун жергедай я.
Ам 1987-йисан 4-августдиз Дербент райондин Белиж поселокда дидедиз хьана. Мектеб къизилдин медалдалди куьтягьайдалай кьулухъ юриствилин пеше хкягъунин мурад авай жегьилди вичин макьсад кьилиз акъудна: 2004-2009-йисара ада Махачкъалада РФ-дин юстициядин министерстводин правовой академияда кIелна.
Вуздани чешнелудаказ, тафаватлудаказ кIелай ватанэгьлидиз вичин рикI алай пешедай кIвалах жагъурун четин акъвазнач: 2011-йисуз ам Новороссийск шегьердин УМВД-дин СУ-да силисчивиле кьабулна, 2014-2017-йисара УМВД-дин дознавателвиле кIвалахна. 2017-йисалай инихъ ада «уголовный дело ва процесс» хиляй агалкьунралди адвокатвиле кIвалахзава. Хизанда кьве веледдиз тербия гузва.
Вичин кIвалахдилай алава яз, Низам Малласеидова Новороссийскда авай лезгийрин тешкилатди кьиле тухузвай мярекатрани иштиракзава, юридический рекьяй пешекарвилин куьмекар гузва.
Кьисметди Новороссийскдиз акъудуникай ихтилат ая лагьайла, Низама къейдна: «Зун 2010-йисуз Новороссийскдиз куьч хьана ва пешедай кIвалахал акъвазна. Таможнядин хиле кIвалахзавай Марат стхади авур теклиф за хушдиз кьабулна. Ингье гила за жуван кьисмет, кIвал-югъ и шегьердихъ галаз алакъалу авунва. Амма диде-буба яшамиш жезвай ватандиз зун мукьвал-мукьвал хъфизва».
Силисчивилин къуллугъдилай адвокатвилел элячIунин себеб вуч я лагьана жузурла, ватанэгьлиди кьвед лагьай пешедин хъсанвал жуван кIвалах ва вахт азадвилелди тайинарунин мумкинвал аваз хьунихъ галаз алакъалу я лагьана. РикI алай пеше хкягъайла, агалкьунарни жеда, кIвалахдай ашкъини квахьдач, гьа са вахтунда инсанриз гузвай куьмекдин кьадарни артух жеда.
Низам Султанагьмедован гьакъиндай Новороссийскда авай чи ватанэгьли Марат Гьажиева ихьтин ихтилат авуна: «Ам гьакъисагъвилелди, агалкьунралди кIвалахзавай юрист я. Ада неинки и крайда, гьакI Россиядин маса чкайра авай чи ватанэгьлийризни юриствилин рекьяй куьмекар гузва. Чна, Новороссийскда авай лезгийри, Низам Малласеидов хьтин, баркалла алаз къуллугъ тамамарзавай ватанэгьлийрал гьахълудаказ дамахзава. И шегьерда авай лезгийрин общинадик ватанпересар гзаф хьуни чи руьгь хкажзава».
Еке агалкьунар хьурай чи ватанэгьлийрихъ!
Юриствилин рекьяй куьмек герек хьайитIа, Н. Малласеидовахъ галаз 8 967 650 00 33 нумрадай алакъадиз экъечIиз жеда.
К.Ферзалиев
