Тербиядин кIвалах гьар са девирда важиблу я, хъсан тербия хъсан гележег я. Инсандиз хас тир адалатлувилин, мергьяматлувилин, патав гвайдаз гьуьрмет авунин ерияр гьеле аялзамаз арадал къвезва. И карда образованидин идарайри хизандихъ галаз санал еке кIвалах тухузва. Вичел гьахълудаказ алимринни арифдаррин макандин тIвар алай СтIал Сулейманан райондин образованидин хиле тежрибалу пешекарри кIвалахзава, абуру акьалтзавай несил Ватандиз вафалубур яз чIехи хьунин карда еке зегьмет чIугвазва.

Алай аямда образованидин къурулушда жуьреба-жуьре кьилдин пешекарар чарасуз герек я. И жергедай яз — муаллим-логопедвилин пешени. Аквазвайвал, эхиримжи йисара аял вахтунда чIалал татун тIал алай месэлайрикай сад хьанва. Чи районда и рекьяй зегьмет чIугвазвай пешекарар хьуни чун шадарзава. Ахьтинбурукай сад АгъастIал-Къазмайрин хуьруьн «Чуба­рук» ясли-бахчадин тербиячи, муаллим-ло­го­пед Багьадат Вагьабова я.

— Аялрал зи гзаф рикI ала. Гьар сеферда аялдив рахадайла, адавай вичин фикирар мецелди агакьариз тежедайла, заз куьмекиз кIан жедай, — къейдзава Б.Вагьабовади. — Къе ихьтин пешедин иеси хьунал, аялрин юкьва кIвалахунал за шадвалзава.

Багьадат Вагьабова 1987-йисан 26- март­­диз Кьасумхуьрел Абдулмежид Ами­но­ван хизанда дидедиз хьана. 2004-йисуз агалкьунралди школа куьтягьай руш ри­кIе­ авай къаст кьилиз акъудунин мураддал­ди Дагъустандин госпедуниверситетдик экечI­на. 2009-йисуз ада вуз «специальная­ дош­коль­ная педагогика и психология» рекьяй «Педагог-дефектолог для работы с детьми­ дошкольного возраста с отклоне­ниями в развитии» пеше къачуналди акьал­тIарна.

2015-йисуз Агъа СтIал-Къазмайрал 120 би­цIек патал чкаяр авай, девирдихъ галаз кьадай шар­тIар авай цIийи ясли-бахчадин дарамат шад гьалара ачухна. Гьа йисалай Ба­гьадат Абдулмежидовнади ина вичел тапшурмишнавай­ къуллугъ намуслувилелди­ кьилиз акъуд­зава. Ам ясли-бахчадин лап хъсан тербия­чий­ри­кай сад я. Адал бицIекрин гзаф рикI ала.

Багьадат Вагьабовади гьар юкъуз би­цIекрихъ галаз жуьреба-жуьре рикI аладар­дай мярекатар, фикир желбдай къугъунар­ тешкилзава. Аялрин рахунра авай че­тин­вилерни нукьсанар акъудун, абурун чIал гегьеншарун патал ада гьар жуьре такьатар­ ишлемишзава. И тегьерда тухузвай кIвалах­ди нетижаярни гузва.

— Багьадат Абдулмежидовна гзаф зегьметдал рикI алай, хъсан чирвилер авай, къайгъудар пешекар я. И къилихар себеб яз, ада коллективда вичин чка кьунва.­ КIвалахдин юлдашрин, диде-бубайрин па­тай адаз еке гьуьрмет ава. Аялриз ла­гьай­тIа, ам чпин диде хьиз кIанда. Ихьтин пешекар жуван коллективда хьунал зун шад я, — лугьузва ясли-бахчадин заведующий Рена Фахрудиновнади.

Б. Вагьабовади датIана вичел кIвалах­за­ва, пешекарвал хкажзава. ИкI, ада 2015- йисуз Дагъустандин педагогикадин работ­никрин пешекарвал хкаждай институтда­ «Ин­новационные коррекционно-педа­гоги­чес­кие технологии логопедической работы с детьми дошкольного и младшего­ школьного возраста» программадай, 2018-йисуз Моск­вада «Логопед плюс» центрада «Актуальные проблемы логопедии в соответст­вии с требованиями ФГОС» ва «Логопеди­ческий и зондовый массаж в коррекции­ ди­зартрии в соответствии с требованиями­ ФГОС» прог­раммайрай, 2021-йисуз Ма­хач­­къалада пе­шекарвал хкаждай «Кас­пий» центрада «Реализация ФГОС дош­коль­ного образования: дефектолог (логопед)»­ программадай, 2023-йисуз Санкт-Петербургдин алава­ пешекарвилин образованидин «Логопед-профи» центрада «Дифференциальная диагностика дизонтогенеза под ключ» ва маса программайрай курсар акьалтIарна.

ГьакIни ам Россиядин тежрибалу пешекаррин семинаррин иштиракчи я. И кардикай С. Томилинадин, О. Борщевадин, Р. Каримован къулар алай сертификатри шагьидвалзава.

Багьадат Абдулмежидовна гзаф шабагьрин сагьиб я. Ада районда, республикада кьиле тухузвай мастер-классра, конкурсра, жуьреба-жуьре маса мярекатра активвилелди иштиракзава. ИкI, 2017-йисуз ада  республикадин «Виридалайни хъсан педагогикадин проект» конкурсда иштиракна, 2021-йисуз «Виридалайни хъсан тербиячи» конкурсдин муниципальный паюна 2-чка кьуна. Адаз райондин администрациядин, образованидин управленидин патай са шумудра грамотаяр, дипломар гана. Идалайни гъейри, Б.Вагьабовади районда тухузвай методикадин семинаррикни вичин пай кутазва, кIвалахдин юлдашриз вичин тежриба раиж ийизва. Адахъ и жигъетдай Чухсагъулдин чарар, дипломар ава.

КIвалахдин яцIа авай тербиячидин асул фикирни кьилин макьсад сад я: «Вичин гъве­чIи яшара аялди кIватIай кьатIунунар адаз гележегда герек къведа. Гьавиляй адан пакадин югъ пашманди тахьун патал чна къенин йикъалай къайгъу чIугун лазим я. Къенин аялар, жегьилар чи гележег я».

Дуьз лугьузва Багьадат Абдулмежидовнади. Са шакни алач, ихьтин пешекаррин гъиликай хкатай аялар диде-бубадиз, Ватандиз вафалубур, гьар са патахъай алакьунар авайбур, уьмуьрда бахтлубур жеда!

Зарият  Агъарагьимова