Мергьяматлувилин «ЛЕКИ» фондуни, «Лезги газетдин» редак­цияди ва ФЛНКА-ди Докъузпара райондин администрациядин куьмекдалди 2-ноябрдиз Усугъчайдал Дагъустандин мектебрин 6-7-классрин ученикрин арада хсуси шиирар фасагьатдиз кIелунай акъажунар кьиле тухуда.

Конкурс медениятдин кIвалин дараматда сятдин 10-даз гатIун­да. Нетижаяр чкадал жюридин векилри кьада.

Хъсан чкаяр кьурбур патал пулунин пишкешар тайинарнава:

1 лагьай чкадай – 15 агъзур манат;

2 лагьай чкадай – 10 агъзур манат;

3 лагьай чкадай – 5 агъзур манат.

Ибурулайни гъейри, конкурсда тафаватлудаказ иштиракай мад 20 ученикдив пулунин пишкешар агакьда: 10 аялдив — гьардав 3 агъзур манат, муькуь цIудав — гьардав 2 агъзур манат. Гьа икI, приз­дин 23 чка жеда!

Шиирдин тема жуваз хуш хьайиди хкядай мумкинвал ава: хизандикай (дидедикай, бубадикай, стхадикай, вахакай…), тIе­би­ат­ди­­кай, диндикай, дагъларикай, вацIарикай, ватандикай, гьайванри­кай…

Гъалибчийрин шиирар гуьгъуьнлай «Лезги газетда» чапда.

Аялриз хайи чIал кIанарунин, бажарагълу жегьилар винел акъу­дунин макьсаддалди кьиле тухузвай конкурсда иштиракун патал вири  муаллимри чпин ученикар желбуник чна умуд кутазва.

Конкурсдихъ галаз алакъалу суалар аваз хьайитIа, телефондин и нумрадиз зенгна, хабар кьаз жеда: 8 (967) 777-73-20​.

«Лезги газет»