Москвада «Сад тир Россия» партияди ва жемиятдин «Россиядин бубаяр» тешкилатди «Аскердин буба» медаль ва «Окопдин шем» милли премия гуниз талукьарнавай мярекат тухвана.
Винидихъ къейднавай шабагьар Россиядин 20 Игитдин бубайрив агакьна, 11 кас милли премиядалди къейдна. Абурук Россиядин хейлин регионрай тир СВО-дин иштиракчийрин бубаяр, волонтервилин крар кьиле тухузвай тешкилатрин башчияр квай.
ЧIехи шабагьрин иесияр хьайибурук Россиядин Игит Энвер Набиеван буба Альберт Набиевни ква. Адахъ галаз мярекатда уьмуьрдин юлдаш Суна Набиевади ва «Россиядин бубаяр» тешкилатдин Дагъустандин отделенидин председатель Заур Амиралиева иштиракна.
Альберт ва Суна Набиеври кьегьал хва чIехи авунай ва адаз хъсан тербия гунай чеб ихьтин чIехи дережада руьгьламишунай, чпин зегьмет акунай тешкилатчийриз сагърай лагьана ва ида чпик дамах кутазвайди къейдна.
«Аскердин буба» медалдиз лайихлу хьун пара шадвалдай, разивалдай кар я. Ам неинки чаз гьуьрмет авунин лишан, гьакIни чна веледриз, акьалтзавай несилдиз дуьзгуьн тербия гунин карда чIугунвай зегьметдиз къиметни гун я. Гьар са бубадиз кIанзава вичин хцикай Ватан хуьдай дирибаш кьегьал, халис ватанперес хьана. Чи мурад кьилиз акъатна. Ахьтин хцел чна дамахзава, шадвалзава. Чи гъалибвал мукьва ийизвай, уьлкведин итижар хуьзвай гьар са аскер игит я. Абуруз виридаз сагъвал гурай! Ватан хуьнин кардик гьарда вичин зегьметдин, руьгьдин пай кутун лазим я. Диде-бубаяр чпин веледар ватанпересвилин, инсанпересвилин руьгьдаллаз тербияламишун патал алахъна кIанда»,- лагьана Альберт Набиева.
Набиевриз чIехи шабагьар гун «Сад тир Россиядин» генсоветдин комиссиядин председатель Анна Кузнецовади, «Россиядин бубаяр» тешкилатдин регьбер Андрей Коченова, «Ватан хуьзвайбур» госфондунин правленидин председатель, оборонадин министрдин заместитель Анна Цивилевади тебрикна.
«Аскердин буба» медаль 2023-йисан 9-майдиз тестикьарайди я. Къенин йикъалди Россиядин жуьреба-жуьре регионрай тир, СВО-да игитвал къалурзавай аскеррин 300 буба и шабагьдалди къейднава.
Абад Азадов
