КIвал патал ­важиблу алат

Газ ахъайзавайдакай сигнал гудай алат кIвал патал важиблу шей я. Идакай «Дагъустан патал газ» телеграм-каналди кхьизва.

Чешмедин къейдерай малум жезвайвал, эгер кIвале ихьтин тадарак эци­­гайтIа, газ акъатзавай дуьшуьшдикай­ вах­тундамаз хабар жеда ва и карди ­чIу­ру нетижаяр арадал атуникай хуьда.

Къейдзавайвал, кIвалин кухня ихьтин такьатдалди таъминаруниз гзаф кьадар харжияр акъатзавач ва ам эцигун патал артух вахтни герек жезвач. Ам газдин плитадин мукьув, чилелай кьве метрдин кьакьанда эцигзавай са акьван еке тушир шей я.

Хабар гузвайвал, ахтармишдай такьатди (анализатор), гьавадик газ квайди тайин хьайила, лап къатидаказ сес акъудиз башламишда, гьатта — ван къуншийривни агакьдайвал. Кхьизвайвал, ихьтин дуьшуьшда тади гьалда газ­дин кран (вентиль) агална кIанда, гьакI­ни «аварийный», ва я «экстренный»­ къуллугъриз зенгда: 104 ва я 112-нумрайриз.

Телеграм-каналдин делилрал­ди, уьл­кведа ихьтин сигналдин такьа­тар­ (сигнализаторар) акъудзавай карха­на­яр­ са шумуд ава: Rubetek, «Премьер Групп», «ПКФ «Энергосистемы», «НПФ «Полисервис», «ГазоАналит».

Хатасузвал ва къулайвал патал

Дагъустанда лифтер цIийи къайдада туьхкIуьрунин програм­мадин кIвалах давам жезва. Идакай­ «Дагъус­тан» РИА-дин телеграм-канал­ди хабар гузва.

Чешмеди къейдзавайвал, 2025-йисуз республикада 54 лифт дегишарун пландик кутунва: 48 — Махачкъалада, 6 — Каспийскда.

Агентстводи кхьизвайвал, Дагъус­тан­дин капитальнидаказ туькIуьр хъийи­дай (капремонт) фондунин кьи­лин­­ заместитель Заур Бахмудован­ гафаралди, 2024-йисуз гьеле 12 кIва­ле­ра 35 лифт дегишарнава, абурукай 4 — Къизилюртда, 31 — Махачкъалада. Хабар гузвайвал, йисан эхирдалди мадни 6 лифт дегишар хъувун пландик кутунва. Нетижада 14 кIвали хкаждай цIийи механизмаяр къачуда.

Заур Бахмудован гафарай гьакIни малум хьайивал, 2040-йисалди 1082 лифт дегишарунин игьтияж ава. Ада къейдзавайвал, им лап еке месэла я, адан кьилин макьсадни — агьалийрин хатасузвал ва къулайвал артухарун.

Кудайдан ­къиметар

Дагъустанда бензиндин ва дизелдин кудайдан къиметар агъуз аватна­ва. Идакай, Росстатдал асаслу яз, «Дагъус­тан» РИА-ди хабар гузва.

ИкI, и ведомстводин делилралди, 2024-йисан сентябрдиз, алатай йисан и муддатдив гекъигайла, Дагъустанда бензиндин ва дизелдин кудайдан къиметар агъуз аватнава.

Агентстводи хабар гузвайвал, Росстатдин сайтда 2024-йисан сентябр­дин вацра бензин ва дизелдин кудайдан юкьван гьисабдалди тир маса гунин къиметар (потребительские цены) авай гьалдиз талукь делилар чапнава. Алатай йисан сентябрдин вацрав гекъигайла, Дагъустан кудайдан къиметар хкаж тежезвай, акси яз, агъуз аватзавай регионрин арада авайди малум хьанва.

Раижзавай делилралди, АИ-92 ва АИ-95 маркировкадин 1 литр бензиндин къимет дагъустанвийриз, алатай йи­сав гекъигайла, ужуз акъваззава. Хабар гузвайвал, кьилди къачуртIа, АИ-92 маркадин бензиндин къимет 4,2 процентдин агъуз аватнава — 56,73 манатди­лай 54,35 манатдал кьван. АИ-95 маркадин литр лагьайтIа — 59,96 манат­, им 3 процентдин ужуз я, 2023-йисан сентябрдиз и маркадин бензиндин къимет яз хьайи 61,81 манатдив гекъигайла.

Кхьизвайвал, къимет хкаж хьанвай­ди анжах АИ-98 маркадин бензин я, вични — 9,5 процентдин. ИкI, и дережадин­ бензиндин 1 литр 77,79 манатдай маса гузва, виликан 71,05 манатдин чкадал.

ГьакIни къейдзавайвал, дизелдин кудайдан къиметни агъуз аватнава — 8,2 процентдин. ИкI, чешмеди гъизвай делилралди, шаз адан 1 литр 68,51 манатдай тир, 2024-йисуз лагьайтIа, и рекъем саки 6 манатдин агъуз аватнава — 62,88 манатдал кьван.

Гьазурайди – Муса  Агьмедов