Махачкъалада «Киргу» компанияди ва «Садлагьайбурун Гьерекатди» кардик кутур экологиядин серенжемдин нетижаяр кьуна. Кьве гьафтедин вахтунда мектебра кIелзавай аялри 500 килограммдилай гзаф пластик кIватIна.
«Садлагьайбурун Гьерекатдин» активистри экологиядиз талукь чи серенжемда сифте йикъарилай гьевеслудаказ иштиракна, чахъ гьатта рекордрив агакьай — 100 килограммдилай гзаф пластик кIватIай мектебарни хьана. Нетижаяр чна кьунва, мукьвал вахтунда кIвенкIвечийрин — гъалибчийрин тIварар раижда», — къейдна Дагъустандин «Садлагьайбурун Гьерекатдин» председатель, РД-дин Кьилин куьмекчи Людмила Саидовади.
КIватIнавай пластикдин къапар «Киргу» компанияди цIийи кьилелай гьялун патал заводдиз рекье твада. Ахпа абурукай куьсруьяр туькIуьрда ва вилик чкаяр кьур мектебриз гуда. Къейдзавайвал, серенжемда Дагъустандин образованидин 20 идаради иштиракна.
«Лезги газет»
