Вирироссиядин «Зи уьлкве — Зи Россия» конкурсди арзаяр кьабулун акьалтIарнава. Алай йисуз чпин теклифар Дагъустан Республикадин 2789 агьалиди рекье туна. Конкурс «Образование» милли проектдин сергьятра авай федеральный «Гьар са кас патал яшайишдин рекьяй лифт» проектдин пай я.
2024-йисуз конкурсда 14 йисалай 35 йисал кьван яшар авай жегьилри иштиракзава. Абуру 13 номинацияда чпин авторвилин проектар майдандиз акъуднава. Къейдна кIанда хьи, номинацийрикай 12 — чIехи ксар патал ва 1 аялар патал махсусдаказ туькIуьрнава. Гьа са вахтунда 2 номинацияда — «Зи муаллимвилин теклифар» ва «Зи хизан: ирсдарвал, ивирар ва метлебар» — яшдиз талукь сергьятвилер авач.
«Россия — мумкинвилерин уьлкве» АНО-дин гендиректордин сад лагьай заместитель Алексей Агафонова къейд авурвал, конкурс башламишай 2019-йисалай инихъ адаз ийизвай итиж анжах артух жезва. XXI сезонда конкурсдиз 50 агъзур касдилай арзаяр атана. КIвенкIвечи чкадал муаллимар паталди тир «Зи муаллимвилин теклиф» (17 369 арза), «Зи хизан: ирсдарвал, ивирар ва метлебар» (8 161) ва «Зи мугьманперес Россия» (7 371) номинацияр ала. Рекье тунвай кIвалахриз 2970 пешекарди къимет гуда.
Конкурсдин асул фикир региондин яшайишдин ва экономикадин рекьяй гьалтзавай месэлаяр гьялунал жегьилар желб авун я. Проектрин экспертиза октябрдин эхирдалди давам жеда, гьар са кIвалахдиз, гьич тахьайтIа, пуд пешекарди къимет гуда ва, эгер гьуьжет алай дуьшуьшар хьайитIа, алава яз ахтармиш хъийида.
«Лезги газет»
