Газетра гьикьван кхьизватIани, телеканалрай хабарар гузватIани, пешекарри тикрарзаватIани, ички хъвана, автомашиндин рулдихъ ацукьзавайбурун кьадар тIимил жезвач. Абурун ихьтин амалрин нетижа малум я: бедбахтвилин дуьшуьшар, тахсиркарвилер, рекьера авай инсанрин уьмуьр хаталувилик кутун…
Мисаларни сад-кьвед туш. Дагъустандин госавтоинспекциядин, прокуратурадин къуллугъчийрин делилралди, рулдихъ ички хъвана ацукьнавайбуру саки гьар юкъуз аварияр арадал гъизва. ИкI, МВД-дин пресс-къуллугъди хабар гайивал, алай йисан 11-октябрдиз «Кавказ» шегьреда, Къаякент райондин мулкуна, «Лада Приора» маркадин машин гьалзавай 38 йиса авай касди къаршидиз гьерекатзавай патай гьална ва кьве автомашиндихъ галукьарна. Машинар акьуникди гзаф тIарвилер хьайи «Лада Приорадин» водитель гьа чкадал куьтягь хьана.
* * *
Региондин прокуратуради малумарайвал, Хив райондин судди нубатдин сеферда пиян яз автомашин гьалунай чкадин агьали жавабдарвилиз чIугунин гьакъиндай къарар акъудна. Суддал тайинарайвал, алай йисан июндин вацра итимди, пиян гьалда аваз, Хив хуьре «Газель» машин гьална. И чIавалдини ам тагькимарнавайди тир, яни мад садра пиян яз рулдихъ акунвай.
Къарардин бинедаллаз, итимдивай правояр вахчуна, 3 йисни зура адаз рулдихъ ацукьдай ихтияр амукьдач. Са йис карни атIай адавай «ГАЗ-3302» маркадин автомашинни вахчуна.
* * *
6-октябрдиз Дагъустандин госавтоинспекциядин къуллугъчийри, республикадин рекьера рейд тухвайла, ички хъвана рулдихъ ацукьнавай 16 кас дуьздал акъудна.
Региондин ГИБДД-ди хабар гайивал, кьве водителдилай РФ-дин УК-дин 264.1 статьядин бинедаллаз уголовный делояр къарагъарнава.
* * *
Июлдин вацра тIимил пиянзавай водителди вичин «BMW X5» маркадин автомашин Махачкъаладин Интернациональный сурариз гьална ва са шумуд сурун кьилихъ галай къванер хана, ярхарна. Октябрдиз тахсиркардин суд хьана, ам 30 агъзур манатдин жерме авуна. Идалайни гъейри, адаз са йисни зура автотранспортдин такьатар идара ийидай ихтияр авач.
* * *
Нянихъ «Къарабудахкент — Женгутай» рекье пиян яз «Хендай Элантра» маркадин автомобиль гьалзавай касди вичин машин «Газелдихъ» галукьарна. Руль хуьз тахьай касдин машин рекьяй акъатна ва ада ам рекьин къерехда авай инсанрал гьална. Нетижада са дишегьлини адан кьве гъвечIи аял гьа чкадал телеф хьана.
Арадал атанвай тахсиркарвилин гьалар республикадин прокуратуради ахтармишзава, уголовный дело къарагъарнава.
Чи мухбир
