26-сентябрдиз Москвада, Россиядин халкьарин кIвале, Сардар Абилан (Межидов Абилан) «Бушлат» повестдин презентация хьана. Мярекат Федерациядин лезгийрин милли культурадин автономияди (ФЛНКА-ди) Россиядин халкьарин кIвалин ва Россиядин Президентдин патав гвай РД-дин гьамишалугъ векилханадин куьмекни галаз кьиле тухвана.
Сардар Абилан «Бушлат» повестда гьакъикъатда хьайи вакъиайрикай суьгьбетзава. Ам Украинада физвай дяведикай гьелелиг кхьенвай художественный тIимил эсеррикай сад я. Повестда кьве дустуни, дагъустанви Мегьамед Рамазанова ва чечен Агьмед Сатуева, капитан Сидоров кьиле авай разведчикрин ротадик кваз викIегьвилелди чпин везифаяр тамамарзава. Игитрин къилихар рикIел аламукьдайбур я, абурун арада авай дуствили, женгера дурумлувилини жуьрэтлувили, четин агьвалатрайни лайихлудаказ экъечIиз алакьуни, сад муькуьдаз куьмекдиз къвез гьамиша гьазурвили кIелзавайдаз дериндай таъсирзава.
Повестдин автор — писатель ва публицист, филологиядин илимрин кандидат, Россиядин писателрин Союздин член, Лезги писателрин союздин председатель, гьакIни РД-дин лайихлу юрист Сардар Абил чи халкьдиз хъсандиз чида. Ам Афгъанистандин дяведин ветеран я.
Презентация кьиле физвай «Россиядин Федерация» зал мугьманрай ацIанвай. Абурук ФЛНКА-дин кьиле авайбур ва адан Советдин членар, Гьамишалугъ векилханадин делегация, Россиядин яракьлу къуватрин лейтенантрилай эгечIна, генералрал кьван офицерар, Полициядин колледждин курсантар, гьар жуьре общественный тешкилатрин активистар, яратмишзавай интеллигенциядин векилар — писателарни кинематографистар квай. Мярекатда РД-дин милли политикадин ва динрин крарин рекьяй министрдин куьмекчи Муфрудин Гьажимирзоевани иштиракна.
ФЛНК-дин патай Сардар Абилав ва мярекат тухвай Дербентдин «Нарын-къеле» музей-заповедникдин пешекар Гуьлпери Мирзабалаевадив чухсагъулдин чарар вахкана. КIватI хьанвайбуруз саламдин гафар РД-дин векилханадин заместитель Гьажимурад Кажлаева ва Россиядин халкьарин кIвалин директордин советник Тимур Мегьамедова лагьана. Мярекат Дагъустандин лайихлу артист, «Голос» шоудин гъалибчи Селим Алагьярова мадни гуьрчегарна, ада чIехи гьевесдивди машгьур «Дурнаяр» мани ва СВО-дин женгчийриз бахшнавай вичин «КIвалаха, стхаяр!» композиция тамамарна.
Мярекат повестдин автордин рахунралди акьалтIна. Ада эсердиз виниз тир къимет гунай виридаз чухсагъул лагьана, вичин къул алай ктабар пайна.
Чи мухбир
