Алатай девирра чи бубаяр инсаф течир чапхунчийрихъ галаз женгер кьиле тухуниз мажбур хьана. Чи уьлкведин экуь гележег патал абуру чанар къурбандна.
Ватандин ЧIехи дяведин йисара чи уьлкведин, агьалийрин кьилел гъайи мусибатрикай тIимил кхьенвач. Чи бубайри 1418 йикъан къене тухвай дяведин йикъар чи дидейри, вахари, сусари кьилел чIулав шал алаз, рикIера хер аваз, етим балайрихъ галаз санал кашни мекь эхиз акъудна.
Йисар, Самур вацI хьиз, йигинвал кваз фена. Ингье мад чи секинвал чIурнава. Чи ватандин абадвилелни азадвилел пехил душманри мад кьил хкажнава. 21-асирда Украинадин мублагь чилерал, чи уьлкведин сергьятрив мад миллетбазар пайда хьун? Чпин чIуру ниятар кьилиз акъудунин мураддалди абуру саки муьжуьд йисуз Донецкдин, Луганскдин агьалийрин кьилел тагъай бедбахтвилер хьанач.
Россияди 2022-йисан 24-февралдиз ДНР-дин, ЛНР-дин мулкара миллетбазвилин цIирер дувуларни галаз терг авунин къаст вилик эцигна, дяведин махсус серенжем кьиле тухуз башламишна. Россиядин яракьлу къуватри яваш-яваш са-са хуьр, са-са кIвал Украинадин намуссуз, инсафсуз фашистрикай азадзава.
Къати женгер кьиле физвай майданра ватандин вилик чпин буржи дирибашвилелди кьилиз акъудуналди тафаватлу жезвай кьегьал рухвайрикай сад Ярметов Владик Алиметович я. Алай вахтунда сержант автомобилрин ротадин взводдин командирдин заместитель я.
В. Ярметов 1996-йисуз Мегьарамдхуьруьн райондин Хуьрелрин хуьре дидедиз хьана. Юкьван мектеб куьтягьай ам 2017-йисуз райвоенкоматди армиядин жергейриз рекье туна. Са йисуз намуслувилелди къуллугъ авур аскерди 2019-йисуз РФ-дин оборонадин министерстводихъ глаз икьрар кутIунна, уьлкведин яракьлу къуватрин жергейра акъвазна.
Донбассдин чилел дяведин серенжем башламиш хьайи сифте йикъарилай эгечIна, В. Ярметова СВО-дин зонада къуллугъзава.
2022-йисан 18-мартдиз Кьиблепатан округдин кьушунрин командованидин приказдалди сержант Владик Ярметоваз «За службу на Кавказе» рикIел хуьдай лишан гана.
Украинадин цIийи миллетбазрихъ галаз кьиле тухузвай махсус серенжемда къалурай кьетIен кьегьалвиляй, викIегьвиляй Президент Владимир Путинан къарардали аскердиз Жукован медаль гана.
Кьегьал хцел вири хуьруьнвийри дамахзава. Чи мурад Владик сагъ-саламатдиз, гъалибвал гваз дидедин патав хайи хуьруьз хтун я.
Владик Батманов,
РФ-дин писателрин Союздин член
