Малум тирвал, Дагъларин уьлкведин рухвайри дяведин махсус серенжемда чпин вилик эцигзавай тапшуругъар кьегьалвилелди тамамарзава. Абурун арада республикадин вири районрай, гьа гьисабдай яз, Мегьарамдхуьруьн райондайни викIегь аскерар ава. Райадминистрацияди аскеррихъ чпихъ ва абурун хизанрихъ галаз алакъа хуьзва.

ЦIийихуьряй тир Нуьгьов Халида Россиядин армияда икьрардин бинедаллаз къуллугъ ийиз 9 йис я. Дяведин махус серенжемдани ада сифте йикъа­лай иштиракзава, миллетбазрихъ галаз женгера кьетIен викIегьвал къалурзава. Адахъ хъсан тежриба хьанва.

Дирибаш хцел кьве сеферда хирер хьана. Госпиталра сагъар хъийиз, кIвачел ахкьалтнамазди, мад вичин юлдашрин патав хъфена. Украинадин  фашист­рикай Донбассдин хуьрер, мулкар азад авунин карда душмандиз ягъунар кьазва.

И мукьвара Халид Нуьгьов отпускдиз хизандин патав хтанвай. Ам райондин администрациядин кьил Фарид Агьмедова кьабулна. Гуьруьшда  «Ватан хуьзвайбур» госфондунин Мегьарамдхуьруьн райондин филиалдин яшайишдин координатор Айида Къарахановадини иштиракна.

Ф. Агьмедова махсус серенжемда дирибашвал, уьтквемвал ва юлдашриз чешне къалурзавай аскердиз райондин гьуьрметдин грамота гана, гьакIни адан хизандин яшайишдиз талукь месэлаяр аватIа чирна.

Чи  мухбир