10-октярбдиз Махачкъалада, тарихдин «Россия — моя история» паркуна, международный дережада аваз, «Лезги диктант» вад лагьай сеферда кьиле фида. 2019-йисалай инихъ тешкилзавай марифатдин и серенжем лезги чIалан алемда виридалайни чIехи проектрикай садаз элкъвенва.
Адан кьилин тешкилатчийрин арада лезгийрин милли медениятдин федеральный дережадин автономия (ФЛНКА), «Лезги газетдин» редакция ва Алкьвадар Гьасанан тIварцIихъ галай центр ава.
Алай йисуз «Лезги диктант» СтIал Сулейманан 155 йисан юбилейдиз талукьарнава. Адан сергьятра аваз, иштиракчийрин арада жуьреба-жуьре савкьатар къугъвада, «XX асирдин Гомеран» уьмуьрдиз талукь викторина, лезги халкьдин адетриз, тIуьнриз талукь майданар, СтIал Сулейманан ктабрин выставка тешкилда, А. Омарован «Мир Сулеймана Стальского» ктабдин презентация кьиле фида, лезги студентрив ФЛНКА-ди тешкилнавай Р. Гьайдарован тIварцIихъ галай стипендияр вахкуда.
«Лезги диктант» сятдин 3-даз (15:00) башламиш жеда. Чна ватанэгьлийриз аниз атуниз эвер гузва.
«Лезги газет»
