Инсан патал виридалайни важиблуди, гьелбетда, сагъламвал, амни медицинадин хилен къуллугъчийрилай, абур чпин хиве авай везифайрив эгечIзавай тегьердилай гзаф аслу я.
И йикъара чун ЦIийи Испикрин хуьруьз фена, ана кардик квай фельдшервилинни акушервилин пунктунин (ФАП) кIвалахдихъ галаз таниш хьана. 2021-йисуз эцигай дарамат хуьруьн юкьвал ала. Ана чпихъ медицинадин хиле кIвалахунин гзаф йисарин тежриба авай Фаина Шихбабаевади ва Рита Гьабибулаевади зегьмет чIугвазва. Абуру 700-дав агакьна агьалийриз къуллугъзава.
Фаина Шихбабаевади 1989-йисуз Краснодардин медучилище акьалтIарна. Са шумуд йисуз райбольницада кIвалахна, хъсан тежриба къачур ада 1998-йисалай инихъ и гуьнепатан хуьре ФАП-дин заведующийдин везифаяр кьиле тухузва.
— Чаз, медработникриз, инсанрин сагъламвал багьа я. И кар патал чна зегьметни чIугвазва, — лугьузва Фаина Шихбабаевади. — Чна кьетIен къайгъударвал чи гележег тир аялрин ва жаванрин патахъайни ийизва. Хуьре са йисалай 18 йисалди яшара авай 70 аял ва жаванар ава. ФАП-да кьабулунилай гъейри, чун аяларни жаванар авай кIвалериз мукьвал-мукьвал физва, абурун сагъламвал ахтармишзава, лазимвал авайбуруз медицинадин рекьяй куьмекар гузва.
Рита Гьабибулаевади 1977-йисуз Махачкъалада медучилище акьалтIарна. 12 йисуз Кьасумхуьрел больницада кIвалахна. 1989-йисалай инихъ Испикрин ФАП-да акушерка яз кIвалахзава. Ада лагьайвал, хуьре аял хадай яшара авай 65 дишегьли ава, абурукай сад кIвачел залан я. Абурун сагъламвал хуьн, мягькемарун патал Рита Лазимовнади гьакъисагъвилелди кIвалахзава. Ада гьисабзавайвал, лацу халат алай гьар са пешекардин кIвалахдин вахт суткада 24 сятиникай ибарат хьун лазим я. Ам вичин хиве авай везифайрив гьа тегьерда эгечIни ийизва.
ФАП-диз фидалди вилик чна са шумуд касдихъ галаз ихтилатар авуна. Наразивилин келимаяр чаз ван хьанач.
— Инсанар рази хьун шадвал кутадай кар я, — лугьузва заведующийди. — Хуьре ФАП-дин дарамат эцигуни чаз кIвалах хъсанардай, инсанриз медицинадин рекьяй истемишзавай къайдада къуллугъдай мумкинвал гузва. Чи дараматда 7 кабинет кардик ква. Чавай гьар са кас кьилди кьабулиз, сагъламвал ахтармишиз, лазимвал авайбуруз раб ягъиз, дарманар гуз жезва. Сифте нубатда дарманралди ва герек маса затIаралдини чун таъмин я.
Чаз малум хьайивал, Ф. Шихбабаевади ва Р. Гьабибулаевади хуьруьнвийрин арада садакай масадак акатдай азаррин вилик пад кьунин, хуьре сагъламвилин замин тир михьивилер хуьнин месэлайрай гъавурда тунин кIвалахни тухузва.
Испикрин фельдшервилинни акушервилин пунктунин кIвалахдилай райбольницадин кьилин духтурдин везифаяр тамамарзавай Мевлуьдин Алиомаровани разивал къалурна. Ада лагьайвал, хуьруьн ФАП райондин медицинадин хъсан идарайрин арада ава.
Хиве авай везифаяр намуслудаказ кьилиз акъудзавай Фаина Шихбабаевадизни Рита Гьабибулаевадиз испиквийрин патай гьуьрмет ава, абуруз лацу халатар леке алачиз хуьзвайбур лугьузва.
Хазран Кьасумов
