Дикъетлу хьуниз эвер гузва!

Дагъустандин здравоохраненидин министрдин везифаяр вахтуналди тамамарзавай Ярослав Глазова респуб­ликадин агьалийриз рекьера гьерекатдин къайдайрал дикъетлудаказ амал авуниз эвер гузва. Идакай ведомстводин телеграм-каналди хабар гузва.

Кьилди къачуртIа, Я. Глазова гъизвай делилралди, алай йисан 8 вацран муддатда Дагъустандин мулкарал рекьера улакьрихъ галаз алакъалу 1170 дуьшуьш хьанва. Министрди къейдзавайвал, и ДТП-рин нетижада 210 кас кечмиш хьана, 1551 касдизни — хасаратвилер. Хабар гузвайвал, абурун арадай яз, чпин яшар 16-йисал къведалди тир 20 аял кьена, 171 аялдиз хасаратвилер хьанва.

Рейтинг туькIуьрнава

Дагъустанвийри гьар вацра комму­нальный къуллугърай гьакъи гун патал­ чпин къазанжийрикай 6,7 процент харж­зава. Идакай «Дагъустандин экономика» телеграм-каналди хабар гузва.­

ИкI, чешмеди къейдзавайвал, уьл­кведа коммуналный къуллугърай гузвай гьакъийрин кьадаррин жигьетдай регионрин арада рейтинг туькIуьрнава. Кьилди къачуртIа, Дагъустанда жергедин агьалийри яшамиш жезвай чкадин къуллугърай гьакъи гун патал чпин къазанжийрин умуми гьисабдикай 6,7 процент ва я 4 агъзур манат харжзава. Им уьлкведа лап агъада авай рекъемрикай сад я.

Идалай агъада анжах Астрахандин область ава — 6,3 процент, Калмыкияда лагьайтIа, — 6,6 процент.

Къейдзавайвал, коммунальный къул­­­­лугърай виридалайни еке харжияр Чукоткада, Бурятияда ва Амурдин областда акъатзава — юкьван гьисабдалди­ 13,5 процентдилай гзаф яз.

Алай йисуз ­вахканва

Мукьвара Дагъустандиз кIвалахдин рекьяй мугьман хьайи уьлкведин эцигунрин ва ЖКХ-дин министр Ирек Файзуллина республикадин эцигунрин ва кIвалерин коммунальный майишатдин хилез къимет гана. Ада гьакIни респуб­лика вилик тухун патал хъсан мумкинвилер авай хилерикайни суьгьбетна. Идакай «Дагъустан» РИА-ди хабар ­гузва.

Министрдин гафаралди, санлай къа­чурла, яшайишдин кIвалер эцигунин рекьяй Дагъустандин комплекс­ди кIва­лах агалкьунралди кьилиз акъуд­зава. ИкI, алатай йисуз гзаф кьадар яша­­йишдин кIвалер вахкан­ва. ЦIи ла­гьайтIа, — 2,6 миллион кв. метр.

РикIел хкин, виликдай, 2023-йисан нетижайралди, Дагъустанда ишлемишиз вахканвай яшайишдин кIвалерин кьадар 30,8 процентдин артух хьанвайдакай кхьенай. Идакай а чIавуз РД-дин эцигунрин, архитектурадин ва ЖКХ-дин министерстводин пресс-къуллугъди хабар ганай.

Чешмеди гъизвай делилралди, икI, 2023-йисуз регионда 1 миллионни 315 агъзур кв.метр­­дин кьадарда аваз яшайишдин кIвалер ишлемишиз вахканва (пландик кутунвайди анжах 1,1 миллион­ кв. метр тир).

2022-йисуз Да­гъус­танда 1 миллион­ни­ 5 агъ­зур кв. метр­ яшайишдин кIва­лер­ вахканай­. 2023-йисуз и рекъем, ви­нидихъ къейднавайвал, 30,8 про­цент­дин­ гзаф хьана.

Чешмеди гьакIни хабар гузвайвал, 2021-йисуз республикада вахканвай яша­йишдин кIвалерин майданрин кьадар 1 миллионни 31 агъзур кв. метрдиз барабар тир.

Уьлкведин эцигунрин ва ЖКХ-дин министр Ирек Файзуллин республикада­ гьялна кIанзавай месэлайрикайни рахана. Адан гафарай малум хьайивал, кьилиз акъудна кIанзавай месэлаяр бес кьадарда аваз, абур уьмуьрдиз кечирмишзава.

Гьазурайди — Муса  Агьмедов