Дяведин махсус серенжем кьиле физвай районра женгер лап къизгъинбур жезва. Россиядин Яракьлу Къуватрин кьушунри, викIегьвал, дирибашвал, жуьрэтлувал къалуруналди, Украинадин миллетбазриз басрух гузва ва сад-садан гуьгъуьналлаз шегьерар, поселокар, хуьрер азадзава. Женгера чи ватанэгьлиярни тафаватлу жезва. Абуру командиррин тапшуругъар зиреквилелди, душмандиз рикIелай тефидай ягъунар кьуналди кьилиз акъудзава. Уьтквем кьегьалрин ва абурун хизанрин гьакъиндай гьукуматди, районрин, шегьеррин гьукумдин органри къайгъу чIугвазва.
Махсус серенжемда Мегьарамдхуьруьн райондай иштиракзавайбурун кьадарни тIимил туш. Райондай, СВО-дин иштиракчийриз куьмек яз, са шумудра жуьреба-жуьре шейэр рекье туна. Отпускдиз ва чпин хирер сагъар хъийиз хтай аскерар райондин администрацияди кьабулзава, абурун хизанрал кьил чIугвазва.
Эхиримжи йикъара гьа ихьтин са шумуд гуьруьш кьиле фена. ИкI, райондин кьил Фарид Агьмедов ЦIелегуьндилай тир Гьасанбег Гьасанбеговахъ, ЦIийи Филяй тир Айнудин Балабеговахъ галаз гуьруьшмиш хьана. Агьмедова аскерривай СВО-да къуллугъ кьиле физвай гьалдикай, чпин юлдашрикай ва хизанрин яшайишдикай хабарар кьуна, кIани-такIан чирна.
— За ва чи райондин вири агьалийри квел дамахзава, — лагьана Ф. Агьмедова. — Куьне чи чIехи Ватандин аслу туширвал, итижар къагьриманвилелди хуьзва. Квез баркалла! Куьн Аллагьди хуьрай! Мад сеферда хайи макандиз Гъалибвал гваз хъша.
Администрациядин кьили викIегь аскерриз гьуьрметдин грамотаяр гана.
Идалай вилик Фарид Агьмедов отпускдиз хтанвай Хтун-Къазмайрилай тир Росгвардиядин аскер Леонард Гьамидуллаевахъ галаз гуьруьшмиш хьанвай. 15 йис идалай вилик РФ-дин оборонадин министерстводихъ галаз икьрар кутIунай ада гилалди лайихлувилелди къуллугъзава. Разведчикрин взводдин командирдин заместитель вичин юлдашрихъ галаз гзаф уламра, четин гьалара гьатна. Виринрай ам лайихлувилелди экъечIна, командиррин тапшуругъар тамамарна. Разведчикдин викIегьвилер шабагьралди къейднава. И мукьвара адаз Сергей Меликова Ватандиз вафалудаказ къуллугъ авунай сагърай лугьузвай чар ракъурна.
Гьайиф хьи, къурбандарни тежез туш. Нубатдин женгина Ярагъ-Къазмайрилай тир Али Гьамидов телеф хьана. Гьуьлуьн пияда кьушундин отделенидин лишанчи гьамиша кIвенкIве жергейра хьана. Миллетбазрихъ галаз кьиле физвай женгера ада дирибашвал къалурна. Райондин администрациядин къуллугъчийри багърийриз башсагълугъвал гана. Рагьмет хьурай вичиз.
Абад Азадов
