И йикъара чав Москвадай шад хабар агакьна: вичин ери-бине Кьурагь райондин КьепIирдилай тир, алай вахтунда Москвадин Некрасовка районда яшамиш жезвай чи ватанэгьли Гьажимурад Абдулгьалимова (42 кг-дин заланвал авайбурун арада) школайра кIелзавайбурун гатун XII спартакиадада гъалибвал къазанмишна. ИкI, азаддаказ кьуршахар кьунай Красноярскда кьиле фейи акъажунрин финалда адаз Санкт-Петербургдай тир спортсмен технический нокаутдалди кумукьна. Гьажимурада вичин «коронный приём» — кIвачер сад-садал чапрасдиз эцигна, гьалкъада тун — ишлемишна. Спартакиадада гъалибвал къазанмишунай адаз стипендия гуда. Жегьилди ам вичин диде-бубадиз пишкешар къачуниз харждайди къейдзава.
Гьажимурад спортдал 6 йис тамам хьайидалай инихъ машгъул жезва. Исятда адан 15 йис я, 10-классда кIелзава. Хъсандиз кIелзавай адан рикI гзафни-гзаф физкультурадал ва биологиядал ала. Ада Олимпиададин резервдин «Юность Москвы» спортшколада тренер Мегьамедрасул Качалован гъилик вичин вердишвилер ва устадвал хкажзава. Азад вахтунда футбол къугъвазва. РикI алай командаяр Махачкъаладин «Динамо» ва Англиядин «Ливерпуль» я.
Спартакиадада гъалибвал къазанмишун чи ватанэгьлидин сад лагьай агалкьун туш. Алатнавай йисара ада гьам азаддаказ, гьамни грекринни римлуйрин жуьреда кьуршахар кьунай Москвадин ва областрин патай хейлин акъажунра иштиракна, кIвенкIвечи чкаяр кьуна. Кьилди къачуртIа, Гьажимурад грекринни римлуйрин жуьреда кьуршахар кьунай Москвадин областдин ва Центральный федеральный округдин кьве сеферда чемпион, Москва шегьердин кIвенкIвечивал патал акъажунрин ва хейлин маса турниррин гъалибчи я.
Чи ватанэгьлидихъ галаз кьиле фейи куьруь суьгьбетдай мадни чир хьайивал, хизан гьар гатуз КьепIирдал хквезва. Инани Гьажимурад спортдивай къерех жезвач. Хайи хуьре тренер Амиль Шихрагьимован гъилик ада вичин устадвал хкажзава. Гьажимурадан буба Роберта аялдал зегьмет чIугунай адаз, гьакIни Москвада тренер тир Мегьамедрасул Качаловаз рикIин сидкьидай сагърай лугьузва. Гаф кватай чкадал лугьун лазим я хьи, Амиль Айдиновичан регьбервилик кваз вердишвилер къачузвай аялри чпикай республикадин дережадин акъажунра кIвенкIвечи чкаяр кьуналди хабар гузва. Къуй чи вири ватанэгьлийрихъ зурба агалкьунар хьурай!
Рагнеда Рамалданова
