Россиядин спортдин министерстводи, ЧIехи Гъалибвилин 80 йис тамам хьунихъ галаз алакъалу яз, школайра кIелзавай аялриз, муаллимриз, тренерриз ва образованидин идарайрин къуллугъчийриз советрин спортсменри ва физкультурникри ВОВ-да къалурай игитвилериз талукьарнавай Вирироссиядин ватанпересвилин «Спортдин игитар — уьлкведин игитар» проектда иштиракуниз эвер гузва.
Проектдин тешкилатчи Россиядин спортдин министерстводик акатзавай Волгограддин физический культурадин госакадемия (ВГАФК), адан кьилин макьсадни спортдин ва физкультурадин хиле зегьмет чIугвазвайбуру фашизмдал гъалибвал къазанмишуник кутур пай рикIера хуьдайвал авун я.
Проектда иштиракзавай ксари, спортдин игитрин уьмуьрдиз ва спортдин рекьериз талукь материалар, гьакI багърийрин, дустарин рикIел хкунар кIватIна, алай йисан 10-октябрдалди ovrvgafk@mail.ru электронный адресдиз рекье тун лазим я. Идалайни гъейри, материал рекье твазвай касди вичи проектдал кIвалахзавай къайда къалурна, яни фотоматериал ва куьруь видеони (2 декьикьадилай виниз тушиз) рекье туна кIанзава. Абур лагьайтIа, федеральный «Спорт — уьмуьрдин норма» проектдин ва Россиядин минспортдин сайтра эцигда.
Мадни проектдин нетижада «Зун игитрин девирда яшамиш жезва: дяведин игитар — спортдин игитар» электронный ктаб алава материалралди девлетлу жеда.
Эгер чи ватанэгьлийрикай и проектда иштиракиз кIандайбур аватIа, абуру 10-сентябрдалди и кардикай хабар гун, яни арза рекье тун лазим я. Мадни лазим малуматар, ВГАФК-дин жегьилрин крарин рекьяй проректор Ирина Кирилловадихъ галаз алакъадиз экъечIна (телефон: 8 (988) 967-48-07, электронный адрес: cpkkirillova@mail.ru), чириз жеда.
Рагнеда Рамалданова
