Муаллимрин мажибриз вил вегьин хьайитIа, ахьтин фикирдал къвезва хьи, чи гьукуматдин членар, школайра кIелдайла, “кьведар” къачуз зирекбур тир. Гила, мумкин я, чпиз пис къиметар яна лугьуз, муаллимрилай кьисас вахчузва…
* * *
— Россияда, иллаки Дагъустанда, девлетлу хьун патал я коррупционер хьана кIанда, я коррупциядихъ галаз “женг” чIугвазвайди.
* * *
— Вун дустагъда вучиз ацукьарайди тир?
— Ришвет къачуна лугьуз.
— Бес икьван фад вун анай гьикI хьана ахкъатна?
— Ришвет гайивиляй…
* * *
— Тажуб жедай кар я: гьам дуьнья, гьамни инсанар гьикьван фад-фад дегиш жеда, иллаки — мехъерар авурдалай кьулухъ!
— Ун-е, эвленмиш жедалди заз вири дишегьлияр бегенмиш тир.
— Бес гила?
— Гила — садан тIимил…
* * *
Банкетда авай папа гъуьлуьз:
— Вун гьамиша гьа ихьтинди я — гьар сеферда вад лагьай рюмка хъвайидалай кьулухъ вун лап такIан къведай гьайвандиз элкъведа…
— ГьикI, ам вуч лагьай гаф я? За хъванач кьван.
— Вуна хъваначтIа, за хъвана хьи…
* * *
— Кьве касдин арада ихтилатар кьиле физва.
— Яда, ина вуч хьанвайди я? Къвезвай ванер датIана гьа сад хьтинбур я: флан чиновникди бюджетдин пуларикай 20-40 миллион вичихъди авуна, фланда миллиард манатдилай гзаф тIуьна ва икI мад.
— Я -е, дуст кас, дуьнья гзаф алаш-булаш хьанва.
— Яраб чиновникрини чна кIелай школайрани вузра кIелайди туш жал? Абуруз анра маса тарсар ганатIа?
— Мектебар, вузар гьа садбур я. Анжах, къуллугъдал эцигдайла, абуруз махсус курсарни тешкилзаватIа лугьуда за.
* * *
— Яшлу муаллимди, доскадал кхьинардайла, гьамиша -о-ва -у- гьарфар какадардай, яни -о- лугьуз жедачир. Садра лутувал квай хьтин са ученикдиз адакай зарафат ийиз кIан жеда ва хабар кьада:
— Ам элкъвей -у- яни, муаллим, тахьайтIа, яргъи -у-?
— Яргъи -у- тахьана, кьей хва, бес ам кьакьади кьунвай ви нерин хел яни?!
Гьазурайди — Ш.Шихмурадов
