Кьил саламатдиз амукьна кIанзаватIа, жуван сивяй гафар чурурна акъуда.
Аялрин гьи чка тIар хьайитIани, дидедин рикI тIа жеда.
Гуьрчег цуькведин уьмуьр куьруьди я.
Ахмакьда девлетрихъ ялда, камаллуда — чирвилерихъ.
Къариблухда падишагь жедалди хайи дереде лежбер хьун хъсан я.
Тар — емишри, инсан зегьметди гуьрчегарда.
Ахмакьда ван хьайи кардикай гьарайда, акьуллуда вилериз акурдини акунач лугьуда.
Гишин хьанва лугьуз, сивиз вуч хьайитIани чуькьвемир, хъел атана лугьуз, сивел атай вуч хьайитIани лугьумир.
Секин чка я лугьуз, сир тамани ачухмир.
Дидедин хъел гатфариз къвайи жив хьиз я — гьасятда цIрада.
Яд тIимил авайла, вацIу ван къачуда.
Деведи шараг хана — са ван-сесни хьанач; вечре кака хана — магьледа къакърадин ван туна.
Тади квай хвал гьуьлуьв агакьнач.
Хиялрикай аш жедач, са хурухда авай кIарасарни кIанда, дуьгуь ва чIемни.
Вуч цайитIа, гьам экъечIда.
Гъуьрчехъандин рикI алай кицI я къуьрез кIан жедач, я — жанавурдиз, я — сикIрез.
Мурдарди ягъайдаз кашудихъай кичIе жеда.
Кьилел багьа бармак алукIуналди, ахмакь акьуллу жедач.
Хамунал алай чIарарин ранг дегишарайтIани, жанавурди, сикIре къилихар, амалар дегишдач.
И дуьньядал вуна кепек-шагьи гьикьван кIевиз кьуртIани, абур я женнетдизни тухуз жедач, я жегьеннемдизни.
Патахъдиз ацукьайтIани, дуьздаказ рахух.
Таб-гьилле квайбуруз шагьидарни гьасятда жагъида.
ТIиб юкъуз буьркьуь я лугьуз, рагъ тахсирлу туш кьван.
Вири — чпин дердийрикай, регъуьхъбан цIапуррихъ галай цикай рахада.
Пеш кIвадарнаватIани, чинардал чан ала.
Еб-яргъиди, рахун куьруьди хъсан я.
Гапурдин хер мукьвал-яргъал хъжеда, амма гафунин хер — ваъ.
Хъсан хабарар гвачтIа, къунши хуьруьз фимир.
Чан-рикI ийидай регьимлу гафуни гъуьлягъни тIеквендай акъудда.
Пехилдан мез къуншидин кIвализ бипIинри кьунвай чIулав гурмагъдайни гьахьда.
Зарафатдин гаф лугьудалди вилик, са декьикьада хьайитIани, фагьум-фикир ая.
Патав вичин тIеквен гвайла, гъвечIи кьифни викIегь жеда.
Гъилер, пел чернилдин рангарай хьанва лугьуз — им вун илимлу хьанва лагьай чIал туш кьван.
Жанавурдал хипер хуьн тапшурмишмир.
Хуьруьн уьруьшра вагьшийрин вагьши жанавурди къув ягъайла, кицIерин рикIелай са легьзеда чпин къал-макъалар, арам-шарам алатда.
Кьуьзуь кас рехи ва зайиф ятIани, дуьз жаваб ада ваз гуда, дуьз меслят къалурда.
Акьул маса къачуз жедач — ам къимет авачир кьван багьа я.
Вилиз — патав гвайди, акьулдиз — кьатIунунриз, къанажагъдиз гьам мукьув гвайди, гьам яргъа авайдини аквада.
Жува жуван тарифармир. Эгер вун хъсанди ятIа, гьакIни аквада.
Тухди гишиндаз юлдаш туш.
Мугьмандиз шишинилайни ви ачух чин герек я.
КIватIайди — Ш.Шихмурадов
