И агьвалат 1972-йисуз хьайиди я. А йисан кьуьд гзаф мишекъатди хьана, мекьивал 24 градусдив агакьнавай. Январдинни февралдин варцара, вири районрин рекьер муркIадини живеди кьуна, халкьдиз транспорт ишлемишдай мумкинвал амачир.
9-январдиз, Азербайжандай хъуьтIуьз малариз гудай векьер хкиз, Къурукалалай рекье гьатай зи стхадин машин авария хьана, стхани, адан машинда авай са дишегьлини рагьметдиз фенай.
Мусурманрин адетралди, за стхадин яхцIурар гана кIанзавай. 17-февралдиз, нисинилай кьулухъ, зун поездда аваз Дербентдиз хъфенай. Мекьивилиз килигна автостанция кIевнавай. Захъ а чIавуз Муслим халу лугьудай са яшлу итимни галай. Ам Кочубейда нафтIадин буругърал кIвалахай пенсионер тир, вични Кочубейда яшамиш жезвай. Мукьва-кьилийрал кьил элягъиз, ам Чепелрин хуьруьз хъфизвай.
Йифен сятдин 8-ралди чун гьич са касни квачир Дербентдин автостанциядал аламукьна. И чIавуз, чи бахтунай хьиз, станциядал са жегьил руш пайда хьана ва ада чавай гьиниз хъфизвайбур ятIа хабар кьуна.
Са шумуд югъ тир, мекьивилиз килигна, автобусар физвачир. А руша чаз йиф акъудиз куьмекнай. Зав, хуьруьз хутахиз (стхадин игьсан гуз), са ящик чIем, са ящик апельсинар ва гьакьван кишмишарни гвай. Экуьнахъ, сятдин иридаз хьиз, мад автостанциядал хъфенай. И юкъузни иник са гьерекатни квачир. Садлагьана чи къвалав, салам гана, Сулейман-Стальский райондин а чIаван “Калининский” совхоздин кьилин агроном Шагьмирзоев Рамазан атана акъатна. Ада чавай мекьи и вахтунда автостанциядик вучзавайди ятIа хабар кьуна. За Рамазаназ зи гьал-агьвалдикай лагьана. Ахцегьиз хъфидай улакь авачир. Рамазана са 20 декьикьадилай вичи чаз улакь жагъурун хиве кьунай. Дугъриданни, са герендилай чи къвалав ам номерарни алачир, Горький шегьердай совхоздиз хканвай цIийи УАЗ машин гваз хтана. Шофердиз тапшурмишна: — Агьмед дах Къурукаларин хуьруьв агакьарна, Дербентдиз зи къвалав хъша.
Рамазана лагьайвал, шоферди зун хуьруьз хутахна. Муслим халуни Чепелрал кьван чна ахгакьарнай. Шофер элкъвена Дербентдиз Рамазанан къвалав хъфенай…
Вахтар гьикьван гзаф фенватIани, дуст Рамазана а мекьи хъуьтIуьн юкъуз чаз гайи куьмек рикIелай алатзавач. Хъсанвал квадариз жедай шей туш эхир!.. Вич Дербентда акъвазна, зав машин вугана, зун стхадин яхцIуррив агакьарун…
Рамазан вири уьмуьрда жумартлу кас тирди и са мисалдини лугьузва.
Ихьтинбур, чи Пайгъамбардин гьадисрай, гишиндаз тIуьн гудай, цихъ къанихдаз яд гудай, хъсанвал ийиз алахъдай, писвилихъай катдай, халисан еридин инсанар я. Рамазан Сулейман-Стальский райондин Агъа СтIалдал яшамиш жезва. Къуй ви уьмуьрда гьамишанда сагъвал, шадвал, бахтлувал хьурай, гьуьрметлу дуст!
Дустарикай кьит жезвай и девирда ихьтин мисалар рикIел хкун кутугнава. Дуствал, хатурлувал садрани рикIелай тефидай ерияр я. Жегьил несилри гьа ихьтин мисалрилай чешне къачун лазим я.
Агьмед Агьмедагъаев, хуьруьн майишатдин илимрин кандидат
