Чемпионар тебрикна
И йикъара Махачкъаладин аэропортуна Франциядин меркезда кьиле фейи Гатун Олимпиададин гъалибчияр ва призёрар, Дагъустандай ва Чечнядай тир спортсменар шад гьалара къаршиламишна. Кьилди къачуртIа, абурун арада буьруьнждин медалдиз лайихлу хьайи чи ватанэгьли, Грециядин патай экъечIнавай Даурен Куругълиевни авай.
Шад гьалара кьабулунилай гъейри, Дагъустандин кьуршахар кьунай федерациядин президент, меценат Омар Муртузалиева чи спортсменрив пулдин пишкешарни агакьарна. ИкI, къизилдин медалар къазанмишайбуруз гьар садаз — 5 миллион, буьруьнждин медалрин сагьибриз 2 миллион манат гана. Пулдин пишкешриз абурун тренерарни лайихлу хьана — 2 ва 1 миллиондин кьадарда.
Мадни Дагъустандин кьуршахар кьунай федерациядин патай гьар садаз 1 миллион манат Олимпиададин лицензияр къазанмишнавай, амма акъажунра иштиракиз тахьай спортсменривни агакьна. Абурун арада чи ватанэгьли Шамиль Мамедовни авай.
Даурен Куругълиев Дербентдин администрациядани шад гьалара кьабулна. Спортсмендихъ ва адан насигьатчи, азаддаказ кьуршахар кьунай Дагъустандин хкянавай командадин старший тренер Гьайдар Гьайдаровахъ галаз гуьруьшда шегьердин мэриядин къуллугъчийри, Дагъустандин Халкьдин ва шегьердин собранийрин депутатри, спортдал машгъул ксари иштиракна. Олимпиададин медалдин сагьибдин тIварцIихъ Дербентдин депутатрин собранидин председатель Гьасан Мирзоева, РД-дин Халкьдин Собранидин депутат Велиюлла Фаталиева ва масабуру чими келимаяр лагьана.
— Зун гзаф шад я. Чаз чизва хьи, куьне и макьсаддихъ яргъалди ялна, зегьмет чIугуна. Гуьгъуьнин Олимпиададай куьн «къизил» гваз хтун вилив хуьда. Квехъ сагъвал ва агалкьунар хьурай! — алхишна Дербентдин кьил Агьмед Къулиева.
Чи ватанэгьлидив меценатдин, «EFFEKT development» эцигунардай компаниядин патай пишкеш — Дербентда квартирадин сертификат — вахкана, адан тренердив «Дербент шегьердин вилик лайихлувилерай» — лишан.
Д. Куругълиева хайи шегьерда вич шад гьалара кьабулунай сагърай лагьана, къведай Олимпиададай къизилдин медаль гваз хтуник умуд кутазвайди къейдна.
«Жарулаеван турнир»
Са шумуд югъ идалай вилик СтIал Сулейманан райондин Агъа СтIалдал, А. Жарулаеван экуь къаматдиз бахшна, футболдай кьиле тухузвай республикадин XXIV турнирдин финалдин къугъунар кьиле фена. Виликан йисара хьиз, цIини ам тешкилайбур Жарулаеврин хизан ва райондин спортдин, туризмдин ва жегьилрин рарин рекьяй комитет тир. Турнирдин финалда 6 командади иштиракна.
Къугъунриз тамашиз футболдал рикI алай гзаф кьадар ксар, багьа мугьманар, машгьур спортсменар атанвай. Кьилди къачуртIа, абурун арада авай: Олимпиададин къугъунрин буьруьнждин призёр Даурен Куругълиев, какахьай единоборствойрай машгьур спортсмен Казбек Сайидалиев, азаддаказ кьуршахар кьунай — Шамиль Мамедов ва масабур.
Къизгъиндаказ кьиле фейи къугъунрин нетижада Агъа СтIалрин хуьруьн «Улей» команда — 1, «Агъа СтIал» — 2 ва «Куьре» командаяр 3-чкайриз лайихлу хьана.
Командайрив кубокар, грамотаяр, пулдин ва рикIел аламукьдай пишкешар вахкана.
Рагнеда Рамалданова
