И йикъара, Кубачидин художественный комбинатдин 100 йис тамам хьунихъ галаз алакъалу яз, дагъдин и хуьре халкьдин гъилин сеняткарвилерин Вирироссиядин фестиваль шад гьалара кьиле фена. Макьсад виликан девиррин адетдин гъилин сеняткарвилерал фикир желб авун яз, и серенжемдин тешкилатчи Дагъустандин туризмдин ва халкьдин художественный сеняткарвилерин рекьяй министерство тир. Кьилин амадагвал авурбур: Дахадаев райондин ва Кубачи хуьруьн администрацияр, Махачкъаладин «РемесловЪ» художественный устIархана. Фестиваль ачухуниз талукьарнавай шад мярекатдиз республикадин жавабдар къуллугърал алай ксар, багьа мугьманар, гьа гьисабдай яз, РФ-дин Госдумадин депутат Нурбаганд Нурбагандов, ДГУ-дин ректор Муртазали Рабаданов,  Дагъустандин хизандин, дидевилин ва аялрин ихтиярар хуьнин рекьяй Уполномоченный Марина Ежова, Дагъус­тандин туризмдин ва халкьдин художественный сеняткарвилерин рекьяй министрдин заместитель Анна Безрукова,  РД-дин юстициядин министрдин замес­титель Рабият Закавова, Дагъустандин культурадин министрдин заместитель Мухтар Къурбанов ва масабур атанвай. Сувариз тамашиз атанвайбурун арада этнографар, край чирдайбур, искусстводал машгъулбур, музейра кIвалахзавайбур, художникар, искусствойрин школайрин преподавателар, блогерар, журналистар, фотографар авай. 

Мярекат «Махачкъала» ансамблдин ус­тад­рин кьуьлералди ачухна. Анал рахай Дагъустандин туризмдин ва халкьдин художественный сеняткарвилерин рекьяй министрдин заместитель Анна Безруковади, Дагъустан, Россия вири дуьньядиз машгьур авур Кубачидин художественный комбинатдин асирдин юбилей — лишанлу вакъиа теб­рик авуналди, ана гьазурай шейэр дуьньядин виридалайни чIехи ва девлетлу музейра хуьзвайди къейдна.

Гуьгъуьнлай комбинатдин тарихдикай Дахадаев райондин кьил Мегьамед Аб­дулкъадирова гегьеншдаказ суьгьбетна. Ада цуьк акъудай йикъарни рикIел хкана, къенин йикъан хци месэлаярни веревирдна. Тебрикдин келимаяр Госдумадин депутат Н. Нурбагандова ва масабуруни лагьана.

ИкI, асирдин тарих авай комбинатдин гьаятда тамам пуд юкъуз давам хьайи и мярекатда чи уьлкведин са кьадар регионрай, кьилди къачуртIа, Калмыкия, Чувашия, Татарстан республикайрай, Астранхандин, Нижний Новгороддин, Челябинскдин, Самарадин областрай, Краснодардин крайдай атанвай мугьманри, гьакI чи республика­дин шегьеррай ва районрай тир халкьдин ху­дожественный сеняткарвилерал машгъул­ устадри 40-далай виниз алачухрик фес­ти­валдиз тамашиз атанвай ксар гъилин сеняткарвилин яратмишунрихъ галаз танишарна. Балхардин хъенчIин къапар, гимишдал нехиш атIун, Къайтагъдин ва Кубачидин вышивкадай, яракь гьазурунай ва икI мад мастер-классар къалурна.

Фестивалдин иштиракчияр патал итижлу легьзеяр гзаф хьана: художественный комбинатдин музейдиз тамашун, куьгьне Кубачи хуьруьз хкаж хьун, башнядал­ фин ва икI мад. Кьилди музейдикай рахайтIа, дугъ­риданни, ам тамашуниз лайихлуди­ тир. Кубачидин устадри гьазурнавай затIа­рилай, къаб-къажахдилай гъейри, ана На­дир-шагьдин тур (сабля) ава. Музейдин къуллугъчи Гьажиибрагьим Никаева суьгьбет авурвал, ам музейдин машгьур экспонатрикай сад я. Адан къундахдал  Кубачидин устадри къизилдалди кьетIен нехиш атIанва.

Къейдна кIанда хьи, фестивалдин сергьятра аваз, кьве конкурсни («Сохранение памяти» ва «Взгляд в будущее») кьиле тухвана. Абурун нетижаяр фестивалдин эхиримжи юкъуз кьуна. Конкурсра Кубачидай тир Дауд Куртаев (ада байбут гьазур­янавай) ва Махачкъаладай тир Кали­мат Омарова (ада гъилелди нехиш атIанвай партал къалурнавай) гъалиб хьана. Фес­ти­валдин Гран-Придиз Самарадай­ тир Мар­га­рита ва Александр Бортниковар («Царское» ­булушка къалурнавай) лайих­лу хьана.  Фестиваль кьиле фейи пуд юкъузни адан иштиракчийриз ва мугьманриз милли хуьрекар дадмишдай, самоварда­ гьазурнавай чай хъвадай мумкинвални яратмиш­навай.

Рагнеда  Рамалданова