Зулунни хъуьтIуьн муддатдиз гьазур хьун патал «Россетри» Дагъустандиз хсуси такьатрин гьисабдай 1,2 миллиарддин кьадарда пул рекье твада. Идакай «ТАСС» чешмеди хабар гузва.
ЖКХ-дин объектар хъуьтIуьн муддатдиз гьазурунин рекьяй Дагъустандин Гьукуматдин Председатель Абдулмуслим Абдулмуслимован регьбервилик кваз кьиле фейи совещанидал РД-дин энергетикадин министр Марат Шихалиева къейд авурвал, «Россети» ПАО-ди йисан эхирдалди Дагъустандин мулкара 25 подстанциядин гужлувал артухардайвал я. Агакьдай такьатрин куьмекдалди герек тир маса серенжемарни кьилиз акъудда.
Тешкилатди электричество ишлемишунин рекьяй сергьятвилер хьунин хаталувал тIимиларунин махсус программани йисан эхирдалди кьилиз акъудун фикирдиз къачунва. «Дагэнергодин» директордин везифаяр вахтуналди тамамарзавай А. Гьажиеван гафаралди, сергьятвилер хьунин хаталувал тIимиларунин программадин сергьятра аваз, и тешкилатди цIийи 15 трансформатор эцигнава.
«Лезги газет»
