И йикъара Жавид Муслимован кIвализ атай шад хабарди неинки белижвийрин, гьакI Россиядин вири ватанпересрин руьгь хкажна. Россиядин Президент Владимир Путинан Указдалди Жавид Муслимован гада, ротадин командир, старший лейтенант Муслим Муслимоваз уьлкведин мулкар Украинадин миллетчийрикай хуьнин карда къалурай жуьрэтлувиляй, душманриз акси ягъунра къалурай дирибашвиляй Россиядин Федерациядин Игитдин тIвар ганва.

И лишанлу вакъиа, махсус серенжемда иштиракзавай чи кьегьал хцин жуьрэтлувал, дирибашвал, хайи Ватан патал чан къурбанд ийиз гьазурвал вири уьлкве гьейранардайди хьана.

Махсус серенжемдин иштиракчи, икь­ван чIавалди садазни хабар авачир  Муслим Муслимован бинеяр гьинай ятIа чирун патал чун Белиж поселокда авай адан буба Жавидан кIвализ фена.

Жавида авур суьгьбетдай малум­ хьайивал, адан дах рагьметлу Муслима­ Белиждин консервиярдай заводдин ОКС-да гьакъисагъвилелди зегьмет чIу­гуна. Вичин бине СтIал Сулейманан­ райондин Сайтархуьрай тир Муслим 1965-йисуз пиперхуьруьнви рушал эвленмиш хьана. Кьве йисалай Дагъус­танда чIехи залзалаяр хьайила, Белиж поселокдиз эвичIайбурун арада Муслиман цIийиз кутунвай хизанни авай. Къарасудин патав ада са гъвечIи кIвал эцигна. Сад-садахъ галаз абуруз пуд гадани — Алим, Мисрихан, Жавид ва кьве руш — Зинаидани Ранета хьана. Жавид хизанда гъвечIи хва хьуниз килигна, лезгийрин адет тирвал, кIвалер адан кIвачихъ яна. Вири велед­рихъ чпин кIвалер-йикъар хьанва.

Жавид 1972-йисуз Белижда дидедиз­ хьана. 1-нумрадин юкьван школа­ акьал­тIарна, 8-нумрадин СПТУ-дик тракто­­рист-­машиниствилин рекьяй кIе­лиз экечI­н­а. Ахпа ада автошколада Ц дережадай­ пеше чир хъувуна. Армиядин жергейриз­ тухудалди, консервиярдай завод­да­ кIва­лахна. 1990-1992-йисара Армиядин жер­гейра­ сифте Свердловскдин областда, гуьгъуьнлай 9 вацра Германия­да взводдин командирдин заместитель­ яз къуллугъна. 1996-йисалай Ахцегьа сергьят хуьзвай отрядра, ахпа Рутула авай сергьятар хуьдайбурун комендатурада отделенидин командир яз къуллугъна. 1997-йисуз­ Жавид Герейханован совхоздай тир Рабидин руш Валидадал эвленмиш хьана. Вичин юлдашни галаз ам Рутулиз рекье гьатна. Жегьилар палаткадик яшамиш жезвай. 1998-йисан 1-августдиз абу­руз сад лагьай велед хьана, адал чIехи бубадин тIвар Муслим эхцигна. Инай ам къуллугъ давамариз Хинериз ракъурна. Ленинградда прапорщик­рин курсар кIелна хтайла, къуллугъ давамарна.

Советрин Союздин Игит Абас Исрафилован тIварцIихъ галай­ гим­назиядин 4-класс акьал­тIарай Муслим бубади Дербентдин кадетрин шко­ла-интернатдик кутуна. А вахтунда­ кадетрин школа-интернатдиз регьбервал гайи отставкада авай полковник Максим Рамазанович Эминова рикIел хкизва: «Муслим Муслимова, кадетрин школа-интернатда кIелдайла, вич алакьунар авай ученик яз къалурна. Ада вири предметрай хъсан чирвилер къачуна Военный, тактикадин ва маса рекьерай факультативдин тарсариз ам  рикI алаз фидай. Адахъ тешкиллувилин алакьунар авай. Муслима вич кьетIивилелди кар ийидай, сабурлу, жавабдарвал вичел къачудай кадет яз къалурна».

2013-йисуз школа-интернат акьал­тIа­рай ам Дагъустандин Огни шегьердин­ аграрный колледждик экечIна. 2019-йисан ноябрдиз адаз Россиядин Армия­дин жергейриз эверна. Свердловскдин областда военный частуна курсар акьал­тIарайла, адаз младший сержантдин чин гана.

Агалкьунрай, къуллугъдин везифаяр гьакъисагъвилелди тамамарунай Муслим учебный центрадин командирдин шабагьдиз лайихлу хьана.

Учебный центрадин начальник, полковник А. Насыбуллова адан диде-бу­бадиз ракъурнавай разивилин чарче ихьтин гафар авай: «Разивилелди хабар гуз кIанзава хьи, куь хва Муслима аскервилин буржи чешнелудаказ кьилиз акъудзава. КIелунрани къуллугъда  алакьунарни пешекарвал къалурзава. Юлдашринни командиррин арада адаз лайихлу гьуьрмет ва авторитет ава. Вини дережадин эдебдин ерийрин чешне, аскервилин стхавилиз, буржидиз вафалу я».

М. Муслимова икьрардин бинедаллаз къуллугъ давамарзава. Сифте ам БМП гьалдайбур гьазурдай отделени­дин командирвиле, ругуд вацралай взводдин командирдин заместителвиле тайинарна.

2022-йисан мартдиз Муслим гуь­гьуьл­лудаказ махсус серенжемда иштиракиз фена. РикIел хкизвайвал, Донбассда ам мотострелковый ротада къуллугъзавай, вичин частунай аниз ракъур­навай юлдашрал гьалтна. Ина ада БМП-2-дин механиквиле ва инструкторвиле къуллугъна. Июндин вацра иштиракай къати женгина адал хирер жезва. Госпиталда духтурри ам кIвачел ахкьалдарна.

26 йис хьанвай ротадин командир, старший лейтенант Муслим Муслимов женгера къазанмишнавай агалкьунрай ва жуьрэтлувиляй 2023-йисан августдиз — «Дирибашвиляй», 2023-йисан ноябрдиз — «ВикIегьвиляй» ва алай йисан майдин вацра Суворован медалриз лайихлу хьана.

Мартдиз Авдеевкадин пата миллетбазрин кар алай муьжуьд чка (опорники) кукIварунин женгера къазанмишай агалкьунрай Муслим Муслимов Россия­дин Игит лагьай тIвар гун патал къалурна.

21-августдиз РФ-дин МО-дин министр Андрей Белоусова Россиядин Президентдин тIварцихъай чи кьегьал хцив Къизилдин гъед вахкана.

М. Муслимов Урусатдин цуьк Анастасиядал ашукь тир. 2021-йисуз эвленмиш хьана. Абурухъ Ясмина тIвар алай са руш ава. Муслимаз вичин велед адан муьжуд варз хьайила къужахламишун кьисмет хьана.

Ингье, гила белижви Жавидан гада, СССР-дин Игит Абас Исрафилован тIварцIихъ галай гимназияда чирвилер къачур старший лейтенант М. Муслимов Россиядин Игитвилин тIварцIиз лайихлу хьанва.

24-августдиз хизанни галаз отпускдиз хтанвай Игит багърийри, мукьва-кьилийри, къуни-къуншийри ва и цIара­рин авторди шад гьалара кьаршиламишна ва гурлу межлис къурмишна.

КIватI хьанвайбуру Игитдиз ЧIехи тIвар мубаракна, душман кукIварна, Гъа­либвал къейд авун алхишна.

Къагьриман  Ибрагьимов