Президент Владимир Путинан Указдалди 2024-йисан 1-августдилай Яракьлу къуватра къуллугъ авунин жигьетдай РФ-дин оборонадин министерстводихъ галаз икьрар кутIунзавай касдиз садра гузвай пулунин кьадар артухарнава. Эгер виликдай 195 агъзур манат гузвайтIа, гила ам 400 агъзур манатдиз барабар жеда.
Им гьукуматдин патай дяведин махсус серенжемда Ватандин итижар хуьзвай кьегьалриз ва абурун хизанриз галайвал авунин, ватанпересвилин зегьмет квадар тавунин лишан я. СВО-да Украинадин миллетбазрихъ, неонацистрихъ галаз женг чIугвазвай вири, РД-дин Кьил Сергей Меликова лагьайвал, халис игитар я. Абурун патахъай гьар йикъан къайгъударвални ийизва.
ИкI, чи республикадин Кьилин тапшуругъдалди махсус серенжемда къуллугъзавай дагъустанвийриз региондай гузвай пулдин кьадар вад сеферда артухарнава, абурув 500 агъзур манат агакьда.
Гила икьрар кутIундайла, дагъустанвийриз са сефердин 1 млн манат гуда. 500 агъзур – Дагъустанди, 400 агъзур федеральный бюджетдай ва 100 агъзурни — шегьеррин, районрин гьисабдай.
Маса регионрикай рахайтIа, анрани махсус серенжемдин иштиракчийриз алава пулар гузва. Мисал яз, Москвада 2024-йисан 23-июлдилай, икьрар кутIунна, махсус серенжемдиз физвайбуруз 1,9 млн манат, Санкт-Петербургда Ватандин итижар хуьзвайбуруз 1,5 млн манат гузва.
Ибурулай алава яз, миллетбазрихъ галаз женг чIугвазвай кьегьалрал хирер хьайила, абур госпиталриз аватайла, аскерриз 3 млн манат гузва. Серенжемда бедендиз хасаратвал хьана, набутвал тайинарнавай касдив алай йисан 1-январдилай са сеферда гузвай 22 908,62 манат агакьда.
РикIел хкин: махсус серенжемда иштиракзавай ксариз банкарихъ, налогрихъ галаз алакъалу кьезилвилер ава. Медицинадин рекьяй къуллугъ авунин, кьилин образование къачунин, кIвалахдал кьабулунин, кIвал эцигдай чилин участок къачунин жигьетдайни галайвилер ийизва.
Абад Азадов
