7-августдиз РД-дин Гьукуматдин Председатель мукьвара къвайи къати марфарин нетижада еке зиянар хьанвай Рутул ва Агъул районриз мугьман хьана. Идакай «Лезги газетдиз» РД-дин Гьукуматдин пресс-къуллугъди хабар гана.
РикIел хкин, къати марфар къунин нетижада Рутул районда 23 хуьруьхъ галаз авай транспортдин алакъа кардикай хкатна, 20-дав агакьна хуьрер са шумуд юкъуз эквер авачиз амукьна. Рутул районда саки 1 километрдин мензилда Самур вацIун къерехда авай кьвалар чкIуникди яшайишдин 15 кIвал, больница ацахьунин, токдин симерин шалманар аватунин хаталувал ава.
Агъул райондани Чирагъ вацIай селлер атуникди мукъвер чкIана, рекьер къайдадикай хкатна. Газет чапдиз вахкузвай чIавуз авай делилралди, и райондин 4 хуьр эквер авачиз амай.
А.Абдулмуслимов арадал атанвай гьаларихъ галаз мукьувай таниш хьана, къати марфарин нетижаяр, энгел тавуна арадай акъудунин тапшуругъар гана. Гегьеншдиз РД-дин Гьукуматдин сайтдай кIелиз жеда.
Агьмед Магьмудов
