4-августдиз Кьиблепатан Дагъустандин районра лезги халкьдин регьбер, дагъвийрин азадвилин женгерин кьиле акъвазай кьегьал хва, имам Гьажи Давуд Муьшкуьрви Урусатдинни Османрин пачагьлугъри Ширвандин хан яз гьисаба кьурдалай инихъ 300 йис тамам хьуниз талукьарнавай «ЧIехи бубайрин рехъ» тIвар ганвай автопробег кьиле фена.
Мярекатдин тешкилатчийрин арада лезгийрин милли медениятдин федеральный дережадин автономия (ФЛНКА), Гьажи Давудан тIварцIихъ галай руьгьдинни марифатдин центр, Алкьвадар Гьасанан тIварцIихъ галай медениятдинни марифатдин центр, мергьяматлувилин «ЛЕКИ» фонд, Кьиблепатан Дагъустандин жегьилрин Союз авай.
И юкъуз 50-далай виниз машинар квай цIиргъини Ахцегь, Докъузпара, Мегьарамдхуьруьн, СтIал Сулейманан, Хив, Дербент районрин мулкарилай чарх яна. И цIиргъиник гьакIни Кьурагь райондайни Дербент, Махачкъала, Каспийск шегьеррай атанвай чи ватанэгьлиярни экечI хъувуна.
Автопробег Ахцегь райондин Чеперин хуьрелай гатIунна. Ина Гьажи Давудан экуь къаматдиз талукьарнавай мярекатни кьиле фена. Анал чкадин агъсакъалри, хуьруьн администрациядин векилри, автопробегдин тешкилатчийри, иштиракчийри чIехи регьбердин агалкьунрикай, тарихдин вилик адан лайихлувилерикай чпин фикирар лагьана. Къейд ийин хьи, ихьтин мярекатар Ахцегьа, Усугъчайдал, Мегьарамдхуьре, АрхитIа ва Кьасумхуьрелни тешкилнавай. Автопробегдин эхирдай Мегьарамдхуьруьн райондин Ярукьваларин хуьруьз мукьва мулкуна, Гьажи Давудан тIварцIихъ галай къеле эцигдай чкадал, рагьметлу имамдин экуь къаматдиз бахшнавай мярекат, спортдин акъажунар, иштиракчийриз дадлу хуьрекар тешкилнавай. Бязи делилралди (кьилди къачуртIа, XIX асирдин сад лагьай паюнин Дагъустандин мулкариз талукь картада къалурнавайвал), и чкада са мус ятIани Гьажи Давудан къеле авай. Мярекатдал рахайбуру чIехи регьбердин гьуьрметдай тешкилнавай ихьтин гьерекатри, серенжемри халкь садзавайди, санал агудзавайди ва абуру чи милли тарих, меденият, адетар, чIал хуьниз таъсирзавайди къейдна. Анал рахайбурун арада Гьажи Давудан тIварцIихъ галай центрадин кьил Самур Алиев, ФЛНКА-дин векилар Садикь Гьасановни Гьуьсен Шагьпазов, «Лезги газетдин» кьилин редактор Мегьамед Ибрагьимов, композитор, журналист Къагьриман Ибрагьимов, шаир, илимрин кандидат Сардар Абил, жемиятдин векил Навои Бутаев, журналист Руслан Къурбанов ва масабур авай.
Чи мухбир
