Хазран Кьасумов
Виридалайни герек, важиблу пешеяр гьибур я? И суалдиз са гафуналди жаваб гуз хьун мумкин туш. Библиотекайра кIвалахзавайбурукай рахадайла, гатуз — серин, хъуьтIуьз чими чкада ацукьна, ийизвай кIвалах я кьван, вуч четинвал ава, лугьудайбурни жеда.
СтIал Сулейманан райондин библиотекайрин къурулушдин (ЦБС) Алидхуьруьн филиалдин заведующий Исрафилова Исли Зиятхановна библиотекарвал регьят пеше я лугьудайбурухъ галаз эсиллагь рази туш. 44 йисуз везифаяр намуслудаказ кьиле тухузвай ам гьахълу тирди, чун библиотекадиз фейила мад сеферда инанмиш хьана. Исли Зиятхановна библиотекадин кIелзавайбур тир Самира Султанова, Альбина ва Сабина Будуловаяр цIийиз хтанвай ктабрихъ галаз танишарунал машгъул тир (шикилда).
— Смартфонрин, планшетрин, электронный ктабрин таъсирдик квай алай девирдин кIелзавайбур библиотекайриз желб авун патал кIвалах тухвана кIанзава, — лугьузва Исли Зиятхановнади. — И карди нетижани гузва. Алай вахтунда, библиотекадай ктабар къачуз, кIелзавайбурун кьадар 300-далай виниз я.
Чаз малум хьайивал, Самира Султановади, Альбина ва Сабина Будуловри библиотекада тухузвай мярекатрани иштиракзава. Абуру чаз СтIал Сулейманан шиирарни хуралай кIелна. Самира Султанова, малум хьайивал, Махачкъалада «Мы помним Сулеймана творения» лишандик кваз СтIал Сулейманан шиирар кIелунай тухвай конкурсда дипломдиз лайихлу хьана.
Исли Зиятхановнадин рикI гъвечIи чIавалай ктабар кIелунал алай. Ида пеше хкягъунизни таъсирна.
— 1978-йисуз Избербашдин педучилище акьалтIарнатIани, гележегдин пеше яз за библиотекарвал хкяна. Кьисмет я жеди, — лугьузва И. Исрафиловади. — Сифтедай са тIимил вахтунда музшколада кIвалахна. 1980-йисалай инихъ библиотекада зегьмет чIугвазва, рикI алай кIвалахди заз руьгьдин таъминвал гузва.
Ктабрин алемда инсанриз дуьз рехъ къалурзавай И. Исрафиловадин къайгъуяр гзаф я: ада машгьур ксарихъ, писателрихъни шаиррихъ, зегьметдин ветеранрихъ галаз гуьруьшар тешкилзава, гьар жуьредин мярекатар, конференцияр кьиле тухузва, цIийи ктабрин выставкаяр ачухзава, кIелзавайбур цIийиз хтай ктабрихъ галаз танишарзава, суварар ва лишанлу йикъар къейдзава. Библиотекада СтIал Сулейманан 155 йис тамам хьуниз талукьарна тухвай яратмишунрин межлисни метлеблуди хьана.
«ХХ асирдин Гомер», «Лезги поэзиядин билбил», «Зурба Россиядин зурба шаир» (абур пудни СтIал Сулейманаз бахшнава), «Лезги чIалан сес зи рикIиз чими я», «Россиядин тарих», «Заз террор авачир ислягь дуьньяда яшамиш жез кIанзава», «Абуру Ватан патал чпин чанар гана», «Зи рикI дагълара ава», «Ватанпересвал эбеди рикIера амукьда», «Чи хуьруьн дамах» ва маса стендри, выставкайри, вилик девирра дагъвийри хуьруьн майишатда ва яшайишда ишлемишиз хьайи къаб-къажахди, алатри библиотекадиз къвезвайбурун фикир чпел желбзава.
Библиотекадин ктабрин фонд 6200-дав агакьзава. Исли Зиятхановнади ктабар кьилди-кьилди эцигнава. Ида гьар са касдиз ктабрикай вичиз лазимди жагъурдай мумкинвал гузва.
Библиотекадиз къвезвайбуру столдал алай «Лезги газет», «Куьредин хабарар», «Дагестанская правда», «Самур», «Дагъустандин дишегьли», «Кард» ва маса газетрикайни журналрикай менфят къачузва.
Чаз И. Исрафиловади вичин кIвалахдин планрикайни ихтилатар авуна. Ада райондин 95 йисан, шаир-фронтовик СтIал Мусаибан, Эффенди Капиеван юбилейриз талукьарнавай мярекатар, СВО-дин иштиракчийрихъ галаз гуьруьш кьиле тухуниз гьазурвилер аквазва.
Исли Зиятхановнади, ЦБС-да кьиле тухузвай мярекатрани активнидаказ иштиракзава, жегьил библиотекарриз чешне къалурзава, кIвалахда куьмекар гузва.
ЦБС-дин директор Назиля Шихбабаевади чаз лагьайвал, И. Исрафиловади районда тухузвай мярекатрал милли культура, адетар, халкьдин сеняткарвал, дидед чIал хуьникай, райондин тарихдикай метлеблу рахунар ийизва, шиирар кIелзава.
И. Исрафиловадин яргъал йисарин намуслу зегьмет СIал Сулейманан райондин кьил Саид Темирханован, мергьяматлувилин «Умуд» фондунин, ЦБС-дин директордин патай гьуьрметдин грамотаяр, чухсагъулдин чарар гуналди къейднава.
Исли Зиятхановнадиз вичин пеше гьамиша виридаз лазимди, герек авайди, инсанриз хийир гудайди яз амукьна кIанзава.
«Библиотека инсаниятдин зигьин хуьзвай ва терг ийиз тежер тек са чешме я», — лагьанай Артур Шопенгауэра. И чешме хуьзвай вирибурухъ, гьабурукай яз Исли Зиятхановна Исрафиловадихъни мягькем сагъламвал, кIвалахда агалкьунар, гьакIни къадирлу кIелзавайбур хьун чи мурад я.
