Нажмудин Шихнабиев
Москвадай Ленинан ордендин сагьиб хьана хтай Сулейман, лезги халкьдин рикI алай шаир яз, виридаз акун ва адаз яб гун кIанзавай.Шаир Ахцегьизни фена хтайдалай кьулухъ. Гуьне патан жемятри Сулейман чпин патав атун райкомдивай тIалабна. А вахтара улакьар, гьатта фургъунарни, вири хуьрера авачир Гуьне пата Испикрин совет тешкилнавай. Меслят хьайивал, Шихидхуьруьн колхоздай Агъа СтIалдал, шаир Сулейман гъиз, фургъун ракъурна. Испикринни Шихидхуьруьн арада Кезинан багъ авай. Майдин варз тир. И патан хуьрерай, далдам-зуьрнедал илигна, инсанар дуьзендал алай Кезинан багъда кIватI жезвай.
ЧIехи агъсакъалривай ван хьайивал, а йисуз пIиниярни фад хьанвай. Сулейманал вил алаз акъвазнавай жемятри (иниз Гуьне патан вири хуьрерай инсанар атанвай) шадвилер, кьуьлер ийизвай ва манияр лугьузвай. Гьар хуьряй къвезвай дестейрив яру пайдахар, чIехи регьберрин портретар ва недай суьрсетни гвай.
Эхирни агъадихъай фургъун пайда хьана. Сулейман акур жемятри, «Яшамишрай чи Сулейман!» лугьуз, фургъун гьалкъада туна. Виридаз адан гъил кьаз кIанзавай. Сулейман аскIан буйдин итим тир, иниз килигна ам мад фургъундиз акьах хъувуна. Гила ам виридаз аквазвай. Халкь, къацу чIурал ацукьна, шаирдиз килигзавай. Сулейманавай халкьди Москвада вич кьабулай тегьердикай, чIехи регьбер Сталинахъ ва писателрихъ галаз хьайи гуьруьшрикай суьгьбет авун тIалабна.
Шаирди галай-галайвал суьгьбетар авуна. Шиирар кIелдай вахтни хьана. Шаирди, фургъунда кIвачел акъвазна, хуралай вичин эсерар кIелзавай. Халкьди гьар са шиир кIелун гурлу капаралди къаршиламишиз хьана. Эхирни шаир фургъундилай авудна, чпин юкьва туна кьуьлер авуна. Шадвилер лап геждалди кьиле фена, тIуьнар гайидалай кьулухъ шаир рекьени хтуна. Амма гьикI: итимри ва дишегьлийри, халкьдин манияр лугьуз-лугьуз, Сулейман авай фургъун са кьадар мензилдиз рекье хтуна.
Сулейман Гуьне патаз атун чIехи сувариз элкъвена. Халкьдин рикIелай и вакъиа садрани алатдач.
