Агьмед Магьмудов
16-21-июлдиз Новосибирск шегьерда залан атлетикадай уьлкведин чемпионат кьиле фена. Ана Урусатдин 65 региондай 300-далай виниз спортсменри иштиракна.
«Лезги спорт» порталди хабар гузвайвал, 55 килограммдал къведалди заланвал авайбурун арада Докъузпара райондин Мискискарин хуьряй тир Исмаил Гьажибегова 1-чка кьуна. РД-дин физический культурадин ва спортдин министерстводин телеграм-каналда чапнавай малуматда къейднавайвал, гила чи ватанэгьлидикай пуд лагьай сеферда Урусатдин чемпион хьанва. Идалай виликни И.Гьажибегова кьве сеферда уьлкведин дережада аваз кьиле фейи акъажунра 1-чка кьунай.
«И сеферда акъажунра иштиракиз тIимил четин хьана. Виликдай тIарвал хьайи чкади вичикай хабар гузвай. Идалайни гъейри, Новосибирскдиз чун геж агакьна, ял ядай, ксудай вахт саки хьанач. Амма и крари заз жуван къаст кьилиз акъудиз манийвал ганач», — лугьузва чемпионди.
Къейд ийин хьи, и акъажунра чи мад са ватанэгьлиди кIвенкIвечи чка кьуна: ахцегьви Асали Абдулгьашумов кишпирдин медалдиз лайихлу хьана. Дагъустандиз гъалибвилер гваз хтай спортсменар Махачкъалада РД-дин физический культурадин ва спортдин министерстводин управленидин начальник Марат Ибрагьимовани жемиятдин месэлайрин рекьяй министрдин куьмекчи Ариф Гьафизова кьабулна ва абуруз нубатдин агалкьунар тебрикна.
