Къагьриман Ибрагьимов

12-июлдиз  Дербент  райондин  Бе­лиж по­­селокдиз Махачкъаладай,СССР-дин Игит Абас Исрафилов рикIел хкиз, адахъ галаз Афгъанистанда интернациональный буржи тамамарай юлдашар, Афгъанистандин дяведин ветеранар атана. Абурун арада Башкириядин Уфа шегьердай тир Нур Мухмадиев, Казбек райондин Хуба хуьряй Гьасан Гьасанов, Абдулкерим­ Абасов, Къизлярдай Агьмед Агьмедов, ­Махачкъаладай Умар-Асгьаб Булатханов, Из­бербашдай Мегьамед  Мегьамедов, Къа­я­­кентдай Абдулкъадиров Абдулкъадир­, Агъа­­ев Эльбрус ва масабур авай.

Белиж поселокдихъ элкъвезвай шегьре рекьин къекъуьндал делегация СтIал Сулейманан райондин Афгъандин дяведин ветеранрин союздин председатель Ислеман Ризаева ва и цIарарин авторди къаршиламишна.

Поселокдин администрацияда мугьманар  Белиж поселокдин кьил Рамиз Гьаби­булаева, «Женгинин стхавал» тешкилатдин Дербентдин чкадин отделенидин вете­ранри, старший прапорщик Мегьамедкьасум Салигьова, Ражидин Эмирбегова, Мурад Керимова ва масабуру кьабулна.

Р. Гьабибулаева вичин рахунра, зегьемвилизни килиг тавуна, женгинин юлдаш рикIел хкиз, Уфа шегьердилай гатIунна, Да­гъустандин кеферпатайни, кьиблепатай­ни Белиждиз атанвай мугьманрал вичи гьейранвалзавайди къейдна:

— Абас Исрафилован тIвар, гимназиядиз, поселокдин куьчедиз, Дербентда паркуниз ва маса районрин хуьрерани куьчейриз гана, эбеди авунва. Гьар йисуз, А. Исрафилован экуь къамат рикIел хкиз, спортдин турнирар кьиле тухузва. Чи Игит Абас Исрафилован экуь къамат рикIел хкиз атанвай квез за рикIин сидкьидай сагърай лугьузва.

Инлай вири Абас Исрафилован сурал- гуьмбетдал фена. Анал дуьа авурдалай гуьгъуьниз мугьманри Абас Исрафилован экуь къамат рикIел хкана.

А. Исрафиловахъ галаз санал къуллугъ авур Нур Мухмадиев: «Абас къуватлу, секин ва гьа са вахтунда викIегь, фагьумна, акьулдалди кар ийидай аскер тир. Ам гвардиядин парашютринни десантдин 357-полкунин инженерно-саперный взводдин командирдин заместитель тир. Сапервал пара четин, жавабдар кIвалах я. Абас, военный колоннадин вилик кваз, я душманрин гуьллейрикай, я фугасрикай кичIе тахьана,  сабур хвена, ажалдинни уьмуьрдин арада авай военный техникадин колоннайризни аскерриз  рехъ ачухзавай кьегьал тир. Гьайиф ихьтин игитар чавай къакъатиз».

А. Исрафиловахъ галаз санал къуллугъ авур Гьасанов Гьасан: «Абасни адахъ галаз мад сад госпиталдиз хканвай. Ам хкай аскерар адахъ галаз къуллугъзавайбурухъ къекъвезвай. И арада абур зал гьалтна. За абуруз, казармада чи часпарар сад-садан патав  хьайидакай ва за адахъ галаз къуллугъ авурдакай лагьана. А вахтунда «Звезда» телеканалдин корреспондентарни атанвай. За абуруз Абасакай куьруь суьгьбетнай. Чун четин шартIара гьим вуж ятIа чир жедай дурумлувилинни дирибашвилин школада санал хьа­на. Абас масадан къайгъу чIугвадай, на­муслу, дирибаш, регьимлу инсан тир. За квез лугьун, Абас руьгьдиз викIегь гада тир».

Абдуселим Кубасов: «Абас телеф хьайи­ла, зун казармада авай. Ам залай зур йисан чIехи тир. 1981-йисан 17-октябрдиз Лаг­ман ви­лаятдин Алишанг хуьруьн патарив операция физвай арада абур моджахедрин чIехи дестедал гьалтна. Абаса бронирован­ный дес­те вилик ракъурун патал вичин взводдихъ­ галаз рехъ минайрикай азадза­вай. Женг физвай арада Абасаз мад кьве фугас акуна. Кьвед лагьай фугас зарарсуз ийидайла, душмандин хъиткьиндай гуьлледи адан руфун падна. ГьакI ятIани, сапер-десантникди женг физвай чка гадар тавуна­, взводдиз команда гун давамарна. Эхиз тежер хирерикди са шумуд йикъалай Абаса­ чан гана. Гьа вахтунда командованиди Абасаз игитвилин тIвар гун патал документар гьазурна ракъурайди зи рикIел алама. А вах­тунда документар  кабинетра какахьна квахьна. Аллагьдиз шукур, урус дишегьли Валентина Макаровадиз Игитвилин тIвар гана кIанзавай чар жагъана, кIвалахдал кIукI гъана».

— Зун Расул Абдулаевич я. Афгъанис­тандиз акъатайла, заз Абасахъ галаз таниш жедай мумкинвал хьанач. Заз женгинин юлдашрин гафарай ван хьайивал, Абас пара жуьрэтлу гада тир. Ана чи гзаф гадайри чанар гана. Аллагьди рагьметлу авурай вири.

За мярекат тешкилай Умар-Асгьабаз куьн атунин себеб вуч ва вуж хьана, лагьана суал гана.

— Чун Афгъандин ветеранар саки гьар йисуз санал кIватI жезва. Нур Рафаилови­ч Уфадай Махачкъаладиз къвез ингье пуд лагьай йис я. Алай йисузни ам, ял ягъиз, чи патав атана. Белиждиз атунин патахъай тек­лиф гайиди Н. Мухмадиев я. Заз адан тек­лиф хуш хьана. За чи гадайриз зенгер авуна, чна кьабулнавай къарардикай хабар гайи­ла, садани ваъ лагьанач. Гьа икI, чун цIуд кас кIватI хьана, кьве машинда аваз Бе­лиждиз атана. Чкадал алайбуруз хабар­ гунин патахъай зун чаз хъсандиз чизвай СтIал Сулейманан райондин Афгъандин дяведин ветеранрин союздин председатель­ Ислеман Ризаевахъ галаз рахана. Амни чкадал алай. Адазни и кIвалах пара хуш хьана.

Ислеман Ризаев,18 йис тамам хьайила­, армиядиз тухвана. Ам Афгъанистандиз ра­къурна. Ислемана минадал хъиткьинай вичин командир къутармишна. Адаз «Да­гъус­тандин халкьдин Игит» лагьай тIвар ганва­. Адан авай са хва Марсела гуьгьуьллувилелди 2022-йисан октябрдилай СВО-да иштиракзава. Старший лейтенант Марсел Ризаев 2-мотострелковый ротадин командирдин военный политикадин кIвалахдай заместитель я.

Игит Абас Исрафилов хьиз, вири игитар чи рикIера гьамиша сагъ яз амукьда.