Докъузпара райондин Къурушрин хуьре алатай гьафтеда цIаяр хкадардай ва къутармишдай часть кардик акатна. Ам ачухунин мярекатда РД-дин Гьукуматдин Председателдин заместитель Рамазан Жафарова, РФ-дин МЧС-дин РД-да авай Кьилин Управленидин начальник Нариман Къазимегьамедова, Ахцегь районда государстводин часпар хуьзвай дестедин командир Алексей Самойлова, Докъузпара, Ахцегь, Мегьарамдхуьруьн районрин кьилери — Мегьамед Шамилова, Абдул-Керим Палчаева, Фарид Агьмедова иштиракна.
Дагъдин хуьре МЧС-дин махсус часть ачухунин игьтияж фадлай авай, гьикI лагьайтIа, Вини Къуруш яргъа авай хуьр я ва иниз гьар йисуз къвезвай туристрин, гьа жергедай яз альпинистрин, кьадар артух жезва.
РикIел хкин, часть эцигиз гатIундайла, иниз Дагъустандин Кьил Сергей Меликов мугьман хьанай ва къандахдиз сифте къванни ада вегьенай.
Къурушвийриз и лишанлу вакъиа Р.Жафарова, Н.Къазимегьамедова, М.Шамилова ва масабуру мубаракна. Вичин рахунра Н.Къазимегьамедова къейд авурвал, часть герек тир вири техникадалди, алатралди таъминарнава. Ина, санлай къачурла, 14 касди зегьмет чIугвазва. Абур вири Докъузпара райондин (Къуруш, Теки, Миграгъ, Усугъчай, Къаракуьре хуьрерин) агьалияр я.
Къейд ийин хьи, 2010-йисалай инихъ Дагъустанда цIаяр хкадардай ва къутармишдай 32 часть ачухнава, къутармишдайбурун — 17, цIаяр хкадардайбурун 9 къуллугъ кардик кутунва.
Чи мухбир
