Кьил кутунва
Избербаш шегьер патал яд тухузвай магистральный турба дегишарунин кIвалахрик кьил кутунва. Идакай «Дагъустан» РИА-ди хабар гузва.
Чешмеди кхьизвайвал, РД-дин эцигунрин, архитектурадин ва ЖКХ-дин министерстводин делилралди, винидихъ чпикай ихтилат физвай вири серенжемар целди таъминардай ва яд санай масаниз акъуддай хилен Сад тир оператордин иштираквал аваз кьиле тухуда.
Хабар гузвайвал, кьилди къачуртIа, пудратчи карханади саки 4 километрдин мензилда цин турба дегишарда: 2 километрда — 630 мм диаметрдин ва 2 километрдани — 1020 мм диаметрдинди.
Министерстводин пресс-къуллугъди къейд авурвал, алай вахтунда 630 мм диаметрдин турбаяр маса къачунва, са шумуд участокда абур дегишарунин кIвалахривни эгечIнава.
Куьлегар вахкана
И йикъара РД-дин зегьметдин ва яшайишдин рекьяй вилик финин министерстводи тIимил къазанжи къвезвай, гзаф аялар авай хизанрив абуруз гьукуматди чара авунвай микроавтобусрин куьлегар вахкана.
Чешмеди къейдзавайвал, санлай къачурла, 5 райондай тир 6 хизан ихьтин улакьрин сагьибар хьана. Хабар гузвайвал, хизанриз улакьар гуниз талукь серенжемар кьилиз акъудун патал пулдин такьатар республикадин бюджетдай чара авуна.
Дагъустандин зегьметдин ва яшайишдин рекьяй вилик финин министрдин везифаяр вахтуналди тамамарзавай Мегьамедзагьид Кихасурован гафаралди, 2022-йисалай инихъ ведомстводи 18 хизандив гьукуматдин патай и жуьредин куьмек агакьарнава. Ада къейд авурвал, гьукуматди 10 ва адалай гзаф аялриз тербия гузвай хизанриз гьар йисуз 6 машин чара ийизва. Чиновникдин гафаралди, республикада и серенжем уьмуьрдиз кечирмишиз им пуд лагьай йис я.
Къейдзавайвал, тайин тир хизандиз, и серенжемдин сергьятра аваз, машин чара авунин къарар махсус комиссияди кьабулзава. Ихьтин комиссияр агьалияр яшайишдин рекьяй хуьдай гьар са управленида кардик ква.
Ведомстводин пресс-къуллугъдин делилралди, чпе 10-далай тIимил ва 15-далай артух тушиз ацукьдай чкаяр авай «Газель» маркадин улакьар 2022-йисуз тIимил къазанжи къвезвай, гзаф аялар авай 6 хизандиз ганай, гьа и кьадарда аваз 2023-йисузни чара авунай.
Чкаяр артухарда
Махачкъалада недай суьрсетар маса гудай 2-нумрадин базардихъ галай мулкарал автомобилар акъвазардай чкаяр артухарун фикирдиз къачунва. Идакай, шегьердин мэрдин заместитель Осман Османован гафарал асаслу яз, «Дагъустан» РИА-ди хабар гузва.
Ада къейд авурвал, Махачкъалада алай вахтунда са шумуд куьчеда, ахтармишунин (пилотный) проектдин сергьятра аваз, гьакъидихъ тир парковкаяр кардик кутунва.
ЯтIани, вилик акъвазнавай месэла гьялун патал недай суьрсетдин метягь маса гузвай и базарни элкъуьрна кьунвай мулкарал, винидихъ къейднавайвал, машинар акъвазардай алава чкаяр арадал гъунин лазимвал ава.
РикIел хкин, виликдай чна, «Дагъустандин экономика» телеграм-каналдал асаслу яз, Махачкъалада 2023-йисан эхирдалди гьакъидихъ тир муниципальный парковка (машинар акъвазардай чка) кардик кутадайдакай хабар ганай.
А чIавуз чешмеди машинар акъвазардай чкадин майдан саки 6 агъзур кв. метрдикай ибарат жедайдакай ва гьа са вахтунда мулкунал, санлай къачурла, автомобилар акъвазардай 492 чка арадал гъидайдакай, эгер и проект агалкьунралди кьилиз акъатайтIа, шегьерда ихьтин чкаяр мадни артухарун мумкин тирдакай раижнай.
Серенжем нетижалуди тирди сифте нубатда шегьердин рекьерал ацалтзавай машинрин пар тIимил ва автомобилрин гьерекат йигин хьуни къалурдайдакай, и делилди шегьерда улакьрихъ галаз алакъалу месэладиз хъсан патахъай таъсирдайдакайни къейднай.
Гьазурайди — Муса Агьмедов
