15-июлдиз Ахцегьа цIийи спорткомплексдин патав гвай ял ядай багъдиз машгьур инкъилабчи Къазимегьамед Агъасиеван тIвар гунин ва ана куьгьнедан чкадал цIийи гуьмбет ачухуниз талукьарнавай мярекат кьиле фена. Ана райондин идарайринни карханайрин регьберри, хуьрерин кьилери, СМИ-рин векилри ва масабуру иштиракна.
— Гьуьрметлу юлдашар, къе чун гзафбурун рикI алай чкадиз элкъвенвай и багъ хайи халкьдин азадвални аслу туширвал патал вичин чан къурбанд авур ялавлу инкъилабчи Къазимегьамед Агъасиеван тIварцIихъ ягъунин ва кьегьал хциз эцигнавай цIийи гуьмбет ачухунин шагьидар я. Ахцегьар баркаллу рухвайралди машгьур я ва абурун арада Къазимегьамед Агъасиева лайихлу чка кьазва. Гьукумдарри са шумудра кьаз, зулумариз, жермеяр илитIиз, Бакудай суьргуьн авунатIани, ада инкъилабчивилин рехъ гадарнач. Ам эхиримжи нефесдалди халкьдин терефдар яз амукьнай…, — лагьана райондин кьил Абдул-Керим Палчаева.
Гуьгъуьнлай Къазимегьамед Агъасиеван уьмуьрдин ва кIвалахдин рекьикай «ЦIийи дуьнья» газетдин кьилин редактор Дашдемир Шерифалиева, инкъилабчидин къамат эбеди авун патал арадал гъанвай цIийи гуьмбетдикай адан автор, машгьур скульптор, Урусатдин художественный академиядин академик Шариф Шагьмарданова ихтилатар авуна.
Абдул-Керим Палчаева Шариф Шагьмардановахъ галаз санал гуьмбет ачухунин лишанлу лент атIайдалай кьулухъ мярекатдин иштиракчийри адал цуьквер эцигна.
Гуьгъуьнлай Ахцегьрин искусстводин школадин аялри чпин кьуьлералди ва медениятдин кIвалин ашукь Исмаил Ризаханова вичин манийралди мярекатдин иштиракчийрин гуьгьуьлар шадарна.
Дашдемир Шерифалиев
