РД-дин Гьукуматдин Председатель Абдулмуслим­ Абдулмуслимова, Кавказдин инвестиций­рин форумдин сергьятра аваз, Кавказди Евразиядин уьл­­квейрихъ галаз хуьзвай амадагви­лин алакъаяр вилик тухунин месэлайриз талукьарнавай эл­къвей столдин кIвалахда иштиракна.

Вичин рахунра А.Абдулмус­ли­мова Махачкъаладин международный аэропортуни региондин улакьрин къурулушда кьазвай кье­тIен чка къейдна. Адан гафаралди, аэропортунихъ къенепатан рейсера са сятда — 250, международный рейсера 190 пассажир кьабулдай мумкинвилер ава. «Алай вахтунда аэропортуна цIийикIа туькIуьр хъувунин кIвалахар кьиле физва. Идахъ галаз сад хьиз самолетри лув гудай ва самолетар ацукьдай цIийи полоса туькIуьрзава», — къейдна республикадин премьер-министрди.

А.Абдулмуслимова алава хъувурвал, алай вахтунда Махачкъаладин аэропортуна Къазахстандиз, Белоруссиядиз, ОАЭ-диз, Саудиядин Аравиядиз, Туьркиядиз, Узбекистандиз, Къиргъизиядиз ва Азербайжандиз международный авиарейсер кардик ква. Гьа са вахтунда Ирандин меркез тир Тегеран шегьердизни авиарейс кардик кутунин жигьетдай меслятар ийизва.

РД-дин Гьукуматдин Председателди, элкъвей­ столдин сергьятра аваз, Урусатдинни Азербай­жан­дин государстводин час­пар­дал алай инсанар, улакьар элячI­дай пунктарни цIийикIа туь­кIуьр хъийизвайди малумарна. КIва­лахар тамамдиз 2027-йисуз акьал­тIарун фикирдиз къачунва.

«Кьилди къачуртIа, «Ярагъ-Къазмаяр» пункт цIийи­­­кIа туькIуьр хъувуна куьтягьнава. Гила адавай­ са йикъан къене 1400-дав агакьна улакьар (пар чIуг­­­­вадай, автобусар, кьезилбур) кьабулиз жезва­. 2027-йисалди «ЦIийи Филер» ва «Тагьирхуьруьн Къаз­маяр» пунктарни цIийикIа туькIуьр хъувуна акьал­­­тIарда», — къейдна А.Абдулмуслимова.

Чи  мухбир