2023-йисан сад лагьай паюнин рекъемрив гекъигайтIа, цIинин йисан сад лагьай паюна Дагъустандиз атанвай туристрин кьадар 8 процентдин гзаф хьанва. Идакай и йикъара Грозный шегьерда кьиле фейи Кавказдин инвестицийрин форумдал РД-дин Гьукуматдин Председатель Абдулмуслим Абдулмуслимова хабар гана.
РФ-дин туроператоррин Ассоциациядин директор Майя Ломидзедин гафаралди, 23-июндиз Махачкъалада, Дербентда арадал атай терактар себеб яз Дагъларин уьлкведиз ял ягъиз къвезвай туристрин кьадар аквадайвал тIимил хьанвай. Амма са кьадар вахт арадай фейила, гьалар къайдадик акат хъувуна.
Рекъемрин чIалалди рахайтIа, 2024-йисан сад лагьай паюна республикадиз 856 агъзур турист мугьман хьанва. Идахъ галаз сад хьиз, Махачкъаладин аэропортуни кьабулзавай пассажиррин кьадарни, шазан йисав гекъигайтIа, 4,1 процентдин гзаф хьанва. ИкI, цIинин йисан сад лагьай паюна «Уйташ» аэропортуниз самолетра аваз 1,3 миллион кас атанва.
Чи мухбир
